Zalen huang: SIKUL KAL HUN

Kum a lo thar a, sorkar thar a piang bawk a, sikul tan hun chungchang sawi a awm leh ta. Sikul tan hun sawn hma hi mi tam takin an sawisel a. An thlirna lam atang chuan sawisel awm tak pawh a ni ngei ang. Mahse sawiselna tam ber hi chu mimal thil deuh leh mahni duhdan nena a inrem tawk loh vang ni deuhvin ka hre thin.

Sikul hi chu sikul a ni nge nge tur tih hi ka ngaihtuah ve dan a ni a, office nen hi chuan tan hun inrual lo phawt se a thain ka hria. Office hun leh sikul tan hun a inrual chuan kan rilru kalphung leh kan nuho sukthlek enin office tlai tur sain sorkarin hun a ruat tihna a ni thei hial ang a, Office-ah lah chuan nuho hi an tam zawk hle bawk si a, kan awmdan tur chu a hriat sa ruakin ka hria. Office tan hun dik taka thleng turin kan fate chu kan tana a remchanna hmun (mahni awmna atanga sikul hnai ber) a luhtir kan han duh lo phawt mai a. Kan fate luhna tur sikul atan chuan kan duh ber kan thlang phawt a, chuta kan fate kan thlah zawhah chuan office kal tura kal leh ta chauh tam tak kan awm ang a, “Ka fate ka thlah a, sir, ka tan tihngaihna a awm lo a ni,” tih kha office tan huna thlen lohna thu tlingah kan ngai dawn tih hi a lang tlang sa ruakin ka hria. 

Tuna kan sikul tan hun hi hma lutuk a nihna ka hre ve lova. Zing dar ngaa thawh a, inbuatsaih ngar ngar hian engkim a peih hman vekin ka hria a. Zing dar ngaa tho peih lo chu zan lamah an inbuatsaih lawk mai turah ka ngai a. Chumi kan thei lo a nih chuan zing dar 4-ah thawh leh mai tur niin ka hria a. Chutianga tih chu buaithlak kan tih avanga sikul tan hun tihdanglam tum chu a dik chiahin ka hre lo a ni. 

Zan lamah duh chen men a, mahni ngaihdana thawh hun ni a kan hriatah thawh a, kan sorkar hna leh kan fate sikul tan hun chuktuah rem thei ang ber tura khawsak chu kan duhdan a ni a. Chumi tur chuan theihtawpin kan nawr ta mai ni ngeiin ka hria. Aizawlah hian zing lamah hian dar sarih leh a chanve vel atanga dar riat (sikul kal hun vanglai) hian traffic hi a tawt ve a, chutah naupang sikul luh fel hun a thleng a, a han leh duak a, chutah dar kaw rik dawn vel atangin traffic a tawt chho leh niin ka hria a. Sikul tan hun dawn a traffic tawt leh office kai hun dawna traffic tawt hi han innang ching leh ta tak tak mai se kan Aizawl khawpui hi engtinnge a awm ang sawi thiam a har ngawtin ka hria. 

A kum tela kan traffic tawt chhoh chakdan hi sawiin a siak lova, Aizawlah hian traffic tawt (traffic congestion) hi kan buaina ber pakhat a ni tawh a. Tunah pawh mahni motor keng chhuak tha ngam lo an tam viau tawh mai. Kan thiante zingah pawh mahni motor hawl chhuah aia Taxi la ta mai ka hre teuh mai a. Kei ngei pawhin motor ken ai chuan a theih hram chuan two-wheeler ka hmang ta zar zar mai. Kan sikul tan hun hi kan sawn leh a nih chuan tuna kan dinhmun mek hi kan pha tawh lovang a, Office kal hun sawn te hi kan la rawt leh reu reu ang tih a hlauhawm tawhin ka hria.

Pu A.Sawihlira khan a thih hma daih khan, ‘Kum A.D 2000 velah chuan Aizawl khawpuiah hian motor pakhatin fit nga zel an chang thei ang,’ ti ang deuh khan a sawi a. Tunhma lawk kha chuan, ‘Krismas dawnah traffic a jam nasa thei,’ kan ti a. Tunah chuan nitin hi a jam nasat ni tak a ni ta hial law maw a tih theih. Kan lirthei lei zat kan enin chu chu thil thleng ngei tur a ni a, he thu ziah lai mek pawh hian lirthei hi a pung mawlh mawlh nitin mai a. Kan kawng neih sa hian daih ngaihna a awm lo. 

Kan sikul tan hun hi tidanglam leh ta ila rin aia nasain kan buai thei tih hi ngaihtuah tham fe a awm a ni. Chumi ngaihtuah lova sorkar hian Office kai hun nena inrual thei deuh tura thu tlukna a siam chuan ngaihtuah chian loh vangin a thu a sut leh a ngai ang tih hlauhawm tak a ni. 

Delhi te nen khuan kan hun hi darkar khat velin a inthlauva. Keini aiin khua a var har a, keini aiin tlai lamah hun an nei rei thung a. Vairamah chuan zanah an meng rei bawk a. Zan dar riata bazar te hi an kalphung ve pakhat mai mai a ni. Chutih laiin keini chu thlasik lai phei chuan tlai dar li leh a chanve-ah te chuan kan inkhar thup tawh a. Mi taima, dawr hawng rei duh pawh an hawn kan phal lova. Chu chauh ni lovin zan lama inkhawm kan duh avangin Office ban tlai te chu kan duh teuh lova. Zing lama che chhuak hma thei bawk si lo, zan lam nek zawnga pawtsei thei bawk si lo hnam kan nih chuan changkan ngaihna a vang viauin ka hria. Kan zan lam nungchang chuti a nih lai chuan keimahni mimal men rei avang te, thawh tlai duh avang tea sikul tan hun zawk tihdanglam tumtu kan awm nual mai hi a mak tehlul nen a mak titu hi ka mak zawk ngeiin ka ring. 

Mahni mimal remchanna ngaihtuah avanga kalphung pumpui thlak tum tak mai hi ka hrethiam lo ve hrim hrim bawk a. Tuna kan sikul tan hun hi Mizoram tan hma lutuk ka ti ve lova. Thawh hma peih loh vanga a pumpui thua kan fel zawkna tur ruahmanna, zak hlek lova sawisel ngawt mai hi fel lovin ka hria. Kan Time Zone te, mihring ‘discipline’ te leh kan khawpui nungchang te ngaihtuahin sikul tan tlai leh hi buaina mai mai niin ka ring.

Ka hlauh em em chu kan sikul tan hun hi kan tidanglam ang a, a tak taka kan han hman dawnin a lo tha si lovang a, kan Aizawl khawpuiah hian nunphung a buai vek ang tih hi a ni.