PICK & DROP

Aizawl khawpuiah City Bus a tlan a, mi tam takin an chhawr ṭangkai em em a, a lawmawm ngawt mai. Aizawla Town Bus a tlan ṭantirh hre pha tan phei chuan vawiina City Bus chhawr ṭangkaitu kan tam takzia han hmuh hian, kan Aizawl khawpui pawhin hma a lo sawn ta hlein Mizote pawh kan ṭhang nasa ve ta hle tih a lang a, lawm hle àwm a ni.

Tun hnaiah sorkarin City Bus te chu mi chuang tur nghaka stand-a ding vung vung lo turin a ti a. Chutianga kan awm theih hun tur chu a nghahhlelhawm ngawt mai. Mi tam tak hi eng vangin nge City Bus-a chuang lova Taxi-a kan chuan ṭhin tih zawhna hi chhang dawn ta ila, mi tam tak chuan, “Taxi chuan hun a duh rei lo zawk alawm,” an tih ngei a rinawm. Bus-a làwnpui hrehawm khawp thuamhnaw leh bungrua kan neih vang te, mi dang nena intlat pawlh kan duh loh hrim hrim vangte a ni kher lo vang. A muangchang zawka kan hriat vanga Bus-a chuang ta lo hi mi ṭhahnem tak kan awm ang tih a rin theih. Ṭhenkhat erawh chuan mi chi tin chi tang nena Bus-a chuanho kha kan duh lem loh vangin mahni pualin Taxi kan la ngei ang tih a rin theih ve tho. Mahni rau rauvah pawh nuamsa deuh leh mi dang nena lirthei pakhata chuanho châk loh hun laite hi a awm ve a. Chu chauh ni lovin mi ṭhenkhat hi chuan mahni tawka dinhmun sang deuh anga lan theihna hi kan phak tawk té teah kan duh ve hrim hrim thei bawk. Mahse mi tam tak chuan kan han ngaihtuah a, thil dang vang ni lovin bus chu muangchang dawn riauva kan hriat bakah, kan kal duhna takah kan chhuk thei lo vang tih kan hlauh vang a ni thei bawk.

Engpawhnise, Aizawla kan City Bus-te hi hei ai hian a dinna bithliahah hian ding rei lo ta se la chu a mi chuangte hi kan pungin a rinawm.

Hmanlai, kum 30/40 kal tawh aṭang khan India ram khawpui lian ber Delhi-ah te chuan hetiang hi an lo hmang daih tawh a. An bus te chuan a dinna hmun tur a thlen chuan a chhunga chuangte chhuk chhung chiah a ding a. A lawn tur lam chu chuti teh vak pawhin a ngaihtuah tawh loh chang a awm. A din chhunga lawn hman hman chu an lawn a, a lawn hman lo chu an chuang lo mai a. Chuvangin lawn hman ngei tumin bus-a chuang duhte kha chu an hmanhmawh ṭhin. Chutiang a nih avang chuan bus-a chuangte chuan an chhukna tur hmun an thlen hmain ṭhutna karah bus din veleha chhuk vat thei turin mipui an tawn a, mi karah an inzep a, hma lamah a kawngkhar hnaih thei anga awm an tum a. Bus din fel hnua tlar hnung lam emaw aṭanga muangchanga chhuk tuma mahni ṭhutna thawhsan ve chauh mai chu a remchang lo va, a chang chuan chhuk duh ngei ngei pawh a tlanpui daih mai a, chutianga chhuk hman lote tan chhuk leh theihna hun chu a dawt leha a din hun chauh a ni. Chuvangin an bus-a chuan kha a hlawk riau mai a. Taxi la buangbar lovin man tlawm zawk fein a kal theih ta ṭhin a ni.

Keini Aizawl khawpuiah chuan hmar lam pan turte chu Khatla-ah te, Zodin-ah te min han dinpui reng mai a. Chhim lam pan turte chu Chanmari, Electric, Israel Point leh Lammualah te a ding rei leh deuh va. A hranpaa chawl lo pawha kan khawpui tlan tlang nan hun kan hman rei tehlul nen, a dinna hmuna a ding rei ṭhin hian chuan a tichakawm lo zual ṭhin a ni. Hetiang hian han ding khawmuang ta ṭhin lo se bus chuang hi kan tam sawt ang em tih ngaihtuah tham tak a ni.

Kan khawpui kawng kan han tih deuh ber, Kulikawn - Bawngkawn hi motor leh motor intlan pelh nan a zauh tawk loh avangin bus-a chuan leh taxi-a chuan hi; chuti taka inthlau lo tur ni awm tak a nih laiin bus chuan a hranpaa din deuh rengna hmun a nei ta tlat a, kan rilru hmanhmawhna nen a intuha ta lo ṭhin a. Heti hi ni lo se, bus-a chuang duh hi kan tam lehzual ang a, bus neitute hi an hlawk zawkin a rinawm. A chang chuan kan bus khalhtute hian passenger lak turah ṭhahnem an han ngai khawp a, kan bus dinna kar hi a inhlat loh tehlul nen kawng laka passenger pakhat lek chuantir tur pawhin motor lianpui leh a chhunga chuang sa zawng zawng hi min han dinpui ta rup mai ṭhin a. Hei hi khawngaihna avanga tih a nih loh phei chuan a mak angreng hle a tih theih.

Mi tam berin taxi aia 2-wheeler taxi kan thlan nachhan chu taxi pangngai aia tlema a lo tlawm zawk deuh vang leh, kan hmanhmawh vang a ni tlangpuiin a lang a. Chuti a nih chuan kan bus hi a din rei loh poh leh chuang tur hi kan tamin a rinawm. He chhutna aṭang hi chuan bus neitute hian he sorkar ruahmanna thar, Pick and Drop an tih, tun aia rang zawka bus dinna hmun chhuahsan tur thu hi tuipui hle awm tak a nih laiin an tuipui tehchiam lo ni tein a lang a. A mak angreng ngawtin a lang. Bus-a chuan intihhmuh an tam poh leh bus neitute hi hlawk tura ngaih an ni a, tun aia mipuiin an bawh theihna tura siam dan awlsam ber chu a dinna hmun ruata din rei loh hi niin a lang.

Ram changkang ṭhenkhatah chuan miin Taxi an hmang tlem hle mai a. Chinchang hre chin chuan bus leh metro an hmang nasa a. Keiniah chuan sum leh pai thua a ngaihtuahawm lo lo ni lem lo hian Taxi hi kan hmang ngam phian lawi hian a hriat theih a. Bus-a kal avanga buaina leh tihtur pawimawh tak tak ṭhulh phah lem lo tura lang hian Taxi hi kan hmang zawih zawih mai niin a lang a. Hetianga kan tih nachhan ber chu kan bus service hi kan duh ang tawkin kan duhna hmun min thlenpui turin a rang tawk lo a ni thei. Bus neitu chu ni ila, a tirah mipuiin bawh hum hum lo mah se nikhaw reiah chuan bus hman ching dawklak an tam beiseiin, a dinna tura hmun bitukah hian a rei lo thei ang ber din dan chu zawn awm tak niin ka hria.

Kan khawpui traffic avanga kan buaina lai tak pakhata lang, Bazar phei te, Bawngkawn kawng peng tṭhuamahte hian lirthei intlanpelh a remchang lo viau mai a, chuvangin he tihdan thar hi lirthei lian neitu tan chuan lawm taka pawm chi niin a lang.