ZPM SORKAR TA LO SE?

Kum 2026 kan chuangkai ta a, kan sorkar hrawn mek ZPM hi kum hnih pumhlum a sorkar ta chiah kan ti thei ang a, kum hnih dang hnathawhna hun a la nei kan ti thei bawk ang. He kum hnih chhunga thil thleng ṭhenkhat leh thleng lo ṭhenkhat sawi kan tum ang.

Sorkar kan tehna tur pakhat chu an sorkar avanga thil thleng leh an sorkar avanga thil thleng ṭhin thleng ta lo hi ni ve awm tak a ni. ZPM an sorkar avang liau liauva thil thleng te, an sorkar hmaa thil thleng ṭhin, mipuiin ngaia kan neih hial tawh thleng chhunzawm ta lo te hi ngaihtuah ila, ZPM sorkar hi Mizo mipui tan a ṭangkaiin a hnemhnang em tih kan ngaihtuah thiam a beiseiawm. Chutiang bawkin kum 30 chuang kalta chhunga Party pahnih Congress leh MNF hunlaia thil thleng kha ngaihtuah ila, a chhe lam a ṭha lamin anmahni avang liau liauva thil thleng eng nge kan hriat tih hi Party sorkar kan tehna tur niin a lang.

1. Sawhthing lei : ZPM hi sorkar lo se chuan sorkarin sawhthing a lei lo ngeiin a rinawm. Congress leh MNF insawrkar chhawk, kum 30 chuang chhung khan ṭum khat chu sawhthing kha lei a ni a. Mahse kha khan a ṭha zawngin sawi zui a hlawh vak lo va, ruahmanna leh tihdan fel tak hnuaia lei pawh ni chiahin a lang lo. Sorkarin khami ṭuma sawhthing a lei dan vel kha sawi chhuah lohte pawh a duhawm zawk hial thei. Chu pawh hmanlai thil a ni a, tam tak chuan kan hre tawh kher lo thei. MNF khan ṭum khat chu sawhthing kha a chingtute kawtkai aṭanga kg. khat cheng sawma lei an intiam a. Mahse an lei leh ta lo. A hnu zelah pawh Congress emaw, MNF emawin sawhthing lei thu an sawi ngai tawh lo va, D A H ṭawngkam te hial pawh a pian phah ti ila a sual lo vang. ZPM Party chauh hi mipuiin sawhthing lei tura kan beisei leh anmahni pawh chiang taka inṭawng tiam an ni. NLUP leh SEDP pawisa faia sem aia kimchangin an lei ta te pawh a tih theih hial law maw. Sawhthing bakah hmarcha, aieng leh hmunphiah thlengin lei turin an intiam a. Mahse sawhthing tluka lian tham leh hriat hlawh tham dang a awm lo va, a ṭhen phei chu sorkarin a lei ngai lovin a chingtute'n an hralh zo fel thei vek.

2. A tling apiang Police : Mizoram sorkar hnuaia a tam thama hnathawktu lakna langsar pawl tak chu Police lak hi a ni ṭhin a. Tun hma, MNF leh Congress sorkar chhung zawng kha chuan sawipuitu leh sawipui theitu zawngin mi an vak huai huai a, tling lo awm tak taka lang pawh lak an awm nual a. Duhsakna avang liau liauva tukverh aṭanga lakte pawh kan beng hriat ngeia insawi theih nana hmang kan hria. Khatih chhung zawng khan Police laknaah reng reng mimal tlin tawkna kha tu ma’n an thlamuanpui ngai lo va, beidawng fe fe an awm nuk. Engpawhnise, theihna te, thiamnate leh pianphung dik avanga rál bei tura mihring tling pangngai, tehfung angkhat vek hmanga lak Mizoramah vawi khat chiah kan hriat ve phak chinah a la thleng kan ti thei ang a. Chu chu ZPM hnuaiah a thleng a ni. Party rilru aṭanga thlirtu tan phei chuan a ZPM Party-a mite an lungawi lo nasa ber hial awm e tih tur a nih laiin, dikna taka police lak an nih huna tling tan chuan a lawmawm lehzual a. A tling lo tan pawh rilru a nat loh ber ṭum a ni hial awm e.

3. Aikal awih loh : Tun hma aṭanga lo inṭan a, nasa tial tial a, ZPM a rawn sorkar ve meuh chuan buaipui tham zet maia sorkar hnaa ‘aikal’ lak kha ZPM chu sorkar lo se a la awm zel ang tih a rinawm chiang viau. Khawvel sorkar hna zawng zawngah Mizorama sorkar hnathawk ṭhenkhat kha an nuamsa ber awm e tih theih a ni. Thawk miah lovin service seniority a neih theih a, thawk miah lovin sorkar aṭangin hlawh pangngai tak a hmuh reng theih a, chawlh la miah lovin chawlh la vang vang ang si, ‘leave account’ hmang heu miah si lovin a awm theih a. A tawpah pension pangngaia pension mai theih a la ni zui cheu va, chu chauh ni lovin an chawlh loh hlawh (leave salary) thlengin an hui leh vek thei bawk a. ZPM sorkar aṭanga kum hnih ral hmain aikal lak theihna a tawp ta.

4. Healthcare Scheme : Tun hma chuan sorkar hnathawkte'n damloh thila an inenkawlna an bill thei a, sorkar hnathawk ve lo tan chuan engmah beisei tur a awm lo. Mahse khawvel ṭhang zelah Golden Card te a lo awm a, sorkar hnathawk ve lo tam takin damloh mangan nikhuaah an senso an bill ve thei ta a. Mizoram chauh ni lo, India ram hmun dangah pawh chutiang chu a ni tho va. Ram changkangah phei chuan an hmanna a rei tawh a. ZPM sorkar hma pawhin damdawia inenkawlna senso hi sorkarin hetiang atana thawhlawm thawhtu apiang chu a lo tumsak a. Mahse kan sorkar hmasa lamah khan kan Healthcare malsawmna lam sawi lovin Healthcare leiba kha kan buaipui luih luih a. Sorkarin a chinfel mai loh avangin Healthcare a inziak lut pawh an kiam rawk rawk hman a. ZPM sorkar hnuah sorkar leibate an tlak fel a (an sawi danin), damlote'n pawisa phawrh ve ngai lovin phairam thlengin inenkawl theihna a lo awm ta. Pipu zaia ‘Chalmar leh chalmar a dang mang e,’ tih ang maiin Healthcare rau rau a indanglam hleih tia sawi loh rual a ni lo.

5. SPORTS HAWI ZAWNG THLAK : Tun hma kha chuan kan infiamna ngaihtuah dan kha a phullem phah zawngin a kal a. Kan ṭawng tu huatthu suhah, phullem kha a phah thiam bik an awm a, in zanga pawh awm mang lohna hmunah te phullem man to tak mai kha kan phah chiam chiam a. Infiam mite aiin phullem lam kha a pawimawh zawk hialin a lang. Tunah chuan kum lo kal leh tur bituk chin neiin chumi en zawn chuan infiammi chher chhuah kan tum ta a. Han ngaihtuah mai pawh hian kan infiamna hawi zawng chu a lo inthlak ta hle a ni. Tun hmaa mihring hmaa phullem awm ṭhin kha tunah chuan tlar hmasaah infiammi an ding ve ta a ni ber mai.

6. KUHVA PHURH THAWM A DAI : Sorkar hmasa hun laia kan kut hnathawktute thin khei a, an chawthleng ben buaksaktu ni ngeia lang, ram pawn aṭanga kuhva phurh luh thubuai awm luih luih kha ZPM sorkar lo pian hnu lawkah a reh ta daih a. ZPM sorkar aṭanga kum hnih a ral chuan a hma lawka manganga rum ngawih ngawih Mizorama kuhva chingtute chuan sorkar hnenah lawmthu an sawi ta. Thil awmdan chu a inthlak nasa ve hle chuan a lang. Mangan thinrim vanga kuhva phurhna motor hal hial a thlen hnu khan lawmthu sawina thu chhuah kan hmu ta zawk a ni.

Mizoram sorkarin a chingtute hnen aṭanga Party inthliarna awm hauh lova sawhthing a lei a, mi zawng zawng ban phaka Healthcare a buatsaih a, insawipui ngai hauh lova police a lak a, aikal a tihtawp a, Office kai hun bi a vawn uluk a, eiruk thuah han dem mai tur Minister kan hriat mai loh hi chuan thil ṭhenkhat, kan duhdan lo deuhva lo thlengte hi chu hriatthiam tum vete pawh a dik hial awm e.

Hetih lai hian thil tam tak chu a ngaiin a la kal niin a lang. Restricted Tender te pawh a la awmin an sawi a, Open Tender lem an tih te pawh awmin an sawi. Hlawhtling lo tura mipuiin kan ngaih thil ṭhenkhatte pawh insawi hmawrhmuh a la awm a, kan kalkawng siam dan kalphung leh hnathawh dante pawh a inthlak chiah em tih sawi ngam a ni lo va. Motor man tova chuang lo tura kan ngaihte pawh an chuang leh tho ni awmin a lang a. Kan insawi hmawrhmuh dan leh kan inlantir dan ang diak diak chuan kan awm lo ni te pawhin a lang. Kum hnih chhung khaw sarih chawm thei tuizemte kha mipui lam chuan kan huphurh ngang mai a, Darzo kai lama Solar Power hmanga tui pump a, kawlphetha megawatt 2400 thar chhuahte pawh kha thil huphurhawm pawh ni satliah lovin thil mak ang deuhvah kan ngai.

ZPM sorkar hrim hrim hi a vannei nite pawhin a lang. An sorkar hnu lawkah Assam Rifles an chhuak a; chumi hnu lawkah relin Sairang a rawn thleng a; chumi nena ṭangkawp ni awm tak chuan Mizoram tlawhtu an pung thut a; kan chanchin ṭha laiin hnam dang hriat thar a hlawh thut a, kan nunphung pangngai ve reng, motor horn hmeh vak vak lohte chuan fak a hlawh ta chiam a. ZPM hi sorkar ta lo se, heng hnam dangin min fakna leh keimahni kutkawih ngei thil lawmawm ṭhenkhat (dik taka police lak, Healthcare huapzo tak, sawisep kai lo Ministers, aikal tihtawp, party bil sawi hauh lova sawhthing inleisak, smuggling tihziaawm leh kan sawi lan kher loh thil dang eng emaw zat) hi a lo thleng tho ang em tih hi ngaihtuah tham tak a ni.