SAWI HLAWH LO BIBLE CHANG

Kan Bible hi a ropui em avang leh Pathian thu a nih avang hian thenkhat chuan kan tanhmun sawhngheh nan kan hmang rim hle a. A buaithlak lai tak zawk erawhchu heti khawpa Bible hmanga tanhmun sawhngheh tum leh Bible ngaina tak tak awm khawm hi Bible zirtirna zawm lo deuh vekin kan inhre ta tlat a. Bible chang hre deuhva kan ngaih te, khawhar-In leh hmundanga Bible thu han vawrh chhuak mai thei te hi Bible nena inrema nung ang hian kan hre chuang lem lo lai tak mai hi a ni.

Keima mimal phei hi chuan Pathian thu sawi tur liau liauva an ding chhuak a nih loh chuan Bible chang tanchhana tanhmun sawhngheh tuma sawi zung zung chi te hi ka hnial duh vak tawh lova, ka titipui peih vak lo bawk. A chhan pawh Bible tanchhan theuh si kohhran hrang kan awm thluah te, kan biak dan kan inpawmsak lo viau lawi si te hi ka hrethiam ve pha chiah lova. Mi rintlak leh mi rinawm anga ngaihte hi an Bible chang hriat tam zawng aṭanga kan teh leh si lohdan te ka ngaihtuah hian ka buai ru deuh tlat a ni.

Mak angreng tak maiin Bible min zirtir dan ni ngeia kan hriata kan han kal hian a tawpah chuan, ‘Zu hi sual tinreng bul,’ ni ta tlat hian kan hria hian ka hre ta pek a. Sual tinreng bul anga zu kan ngaih hian Pathian duhzawng ti leh Bible zirtirna zawm angah kan inngai ta hian ka hria. Heti khawpa Bible chul nel hnam leh Bible leklam hnam hian sual tinreng bul anga zu kan ngai thei hi a mak ti mai lo chuan keini ang rual tan chuan sawi ngaihna a awm ta lo. ‘A thenawm hnena zu in tur petu chu a chung a pik e,’ han tih mai te hi kan hre bel ta viau. Nia, helai thu han chhiar hi chuan midang hnena zu petu emaw, leitirtu emaw hrim hrim chu kan Pathian hian anchhia a lawh tihna ni riakah a ngaih theih.

Mahse ka Bible hi a danglam bik nge ni sual tinreng bul anga ka Bible-in a ziah hi zu a ni ve tlat lo. Thil dang daih, zu ni miah lo hi a ni ka Bible-in sual tinreng bul a tih chu.

‘ṭ thenawm hnena zu in tur petu chu a chung a pik e,’ tih lehlinna hi a Mizo tawng heti hian chhep ta ila a dik zawk mah ang: ‘Nang, thenawmte mualphona tur ngaihtuah a an hnena zu pawh a peka pe hial duh chu i chung a pik e,’ tiin. Tuna mi tam takin kan ngaihdan hi chu a sentence (thu hlawm) chhiar tluan tlin hmaa duhtawk ngah thil niin a lang. ‘Lala chu hrem tur a ni, (coma) vawiina a lo thlen loh chuan,’ tih hi coma hnulam tarlang lem lo hian hrem tur a nih chin kha la vung chho ta ila, hrem tumin kan thawk chhuak nghal mai awm e. A thu ngai reng hi, ‘Vawiinah Lala hi a lo thleng lo a nih chuan hrem ngei tur a ni ang,’ tiin ziak ila chu Lala hrem hi kan hmanhmawh nep deuh mahna. Bible zirtirna leh Bible thu te hi a ril em mai a, induhsak a, inhmangaih tawn a, inlainat tawn ta lova midangte awm mai mai mualphona leh chhiatna ngaihtuah hrim hrim pawh hi Pathianin a huat em avangin chutiang ngaihtuah duh mihring ngat chu vanneihnain a umzui lovang a tihna te pawh a lo ni mahna. Chuti lo deuh hlek pawh chuan thenawmte hi an pawimawh a, chuvangin thenawmte mualpho theihna tur ngaihtuah hi Pathianin a huat zawng a nih avangin heti hian a ti ta a ni. Mahse Pathianin, ‘An chung a pik e,’ a tih tak avangin a tipiktu nih chu kan chak ta viau te pawh a ni thei.

Hman ata tawh, ‘Fai hi Pathian an teuhna ber a ni,’ tiin ‘Cleanliness is next to godliness,’ tih thu hi kan lo letling a. Vawiin thlengin kan la hmang ta zel a. Mahse a thu hi inpersan tak a ni. He thu hian Pathian anpui nihna leh nih lohna lam a sawi reng reng lo. Pathian anna lam thu ni lovin fai pawimawh em emzia lam thu a ni zawk. Faina ngainat hi Pathian ngaihsak tluk thawthanga pawimawh a ni, tih thu kha Pathian an theihna lam rawngkaiin kan chhuah a. Mahse a thu hian pawi dang a khawih lo em mai a, miin faina chu a lo ngainat phah chuan a tha tho bawk si a. ‘A lehlinna hi a dik lo,’ ti a kher kher chu a tul lo mai thei. Mahse Pathian zia leh Pathian hniakhnung zuina ni a hriatna atan inbual emaw, bawlhhlawh then lam emaw ngai pawimawhin nungchang te, rilru putdan te hi ngaih pawimawh loh phah ila chu he lehlinna hi buaipui viau a tul mai thei.

Bible-ah hian chhang bawlhhlawh hlan chungchang a awm a. He chhang bawlhhlawh hi Pathianin a duh lo hle a. Chhang bawlhhlawh chuan Lalpa dawhkan chu hmuhsitawmin a siam a. Chhang bawlhhlawh chu Pathian hnenah hlan hlek loh tur ni awm tak a ni. Mahse he chhang bawlhhlawh chungchang hian sawi a hlawh lova, Lalpa beramte hian chhang bawlhhlawh chungchang sermon kan ngaithla ngai lo. He chhang bawlhhlawh inziahna lehkhabu veka inziak, sawma pakhat pek thu hi chu Campaigner hran inruatin kan bawhzui a, kan inhrilh kur lek luk si. Chhang bawlhhlawh leh ran pian fel lo (kebai leh silawng) hlan te chu Pathian hian a lo duh hauh lo mai. Mahse chhangphut thianghlim lo chungchang hi keini ang member hla (!!!!) te hriat phakah sawiin a awm ngai lova. Chhangphut thianghlim lo chu kan ngai pawimawh lova, sawma pakhat chu a pawimawh hle si. Hneh chhuha thil lak hlan thu te thleng hian kan Pathian hian a lo duh lova. Mi thenkhat thawhlawm hi chu hneh chhuha mipuite chanvo aṭanga lak ni ngeiin a lang si.

Kohhran thenkhat chuan he chhangphut thianghlim lo leh hneh chhuha thil lak hlan thu hi an ngai pawimawh hle mai a. Kohhran thenkhat erawh chuan kan ngai pawimawh hlei thei meuh lovin a lang a. Kan Bible pawh hi thenkhatin an chhiar chuan coma hmalam zawng chauh te hi an chhiar a, a dawt leh chu awm lo ang hmakin an ngai ta mai awm mang e ka ti rum rum.