YMA DAY

YMA Day a lo thlen tawh hi chuan tum hauh lo pawhin engti zawng emaw tal hian lung a leng ve leh rup ṭhin a. A chang leh kum 40 vel kal taa Pu B.Daniala te nena kan khawsakho dan kha kan ngai a, a chang leh chu aia hma hreta Ngopa lama kan ṭhiante nen kan atso dan te kha kan ngai a. A engti zawng pawhin lung chu a leng ve ta hrim hrim mai.

Pu B.Daniala hova kan han khawsa kha chu kan YMA tawp mai a, hlemhlet leh fin em ema YMA aṭanga a hlawkna emaw, mahni tana hamṭhatna han hai chhuah vel kha kan awmphungah khan a tel ve lo tawp a ni mai. Tlawmngaihna leh YMA thuthlung kha kan kuah nghet fu mai a. Pu Daa lah khan, "YMA te chu mahni lam hekna zel hi a ni mai a," a ti mai a. Khatiang kha kan nih avangin a karlaka fiamthu han thawhte kha a nuihzatthlak duh ta bik ṭhin a. Ṭum khat pawh (1989) General Secretary ka ni a, Lungleiah ka awm loh tawpna tur, ka post chelh lai aia sangah min dah nghet tak tak chuang si lovin, mi dang an transfer kal hlei thei lo aiah sorkar hmai phih nan kal turin min transfer a. Chumi ṭuma President Pu Daa thukhawchang chu vawiin thlengin zahawm ka la ti reng mai. Tunlai anga fing taka insawipui leh thiam taka inkar lam hi a awm lo va, Pu Daa khan, “YMA te chu — sorkar hi ka ta a ni a, sorkar hi ka ta a ni — titu kan ni a. Lungawi takin an transfer-na hmunah che chuan kal tur,” a ti mai a. Kei pawh chu tho chu ka ngaihdan a lo ni ve a. Ka va kal ta ngei a. Sorkar a inthlak danglam a, thla li hnuah ka kir leh mai a. Ka rin lawk ang ngeiin ka va inpekna chuan Office lamah a hnu zelah pawh hnemhnanna pakhatmah a nei lo va, ka kar zui hek lo. Ka kal rualin General Secretary ka nihna pawh banna ka thehlut a, mahse chu erawh ka thawhpuiten an pawm duh mai bik lo. Pu Daniala kha YMA-na kawngah chuan a ngaihawm ṭhin ngawt mai. Sorkar mi lian biak tlawn leh eng emaw tia hlawkna han neih te kha a ngaihtuah ngai loh zawng tak a ni. YMA chu YMA zahawm tak leh rin tlak tak nihtir ngar ngar a tum a. Ama’n hlawkna a hmuh vena tur lam a ngaihtuah hauh lo. Vawiin thlenga YMA zahawm kan neih nachhan zingah Pu Daniala kha kei chuan ka puh tlat.

Kum 1985 khan YMA Golden Jubilee a lo thleng a nih kha. Khami ṭuma Ngopaa kan han lawm vete kha chuan khaw dang leh hmunpui lian zawk kan ngai lo kher mai. Kei kha ICDS-ah awmin CDPO ka ni a, Ngopaa Officer lian pui pui awmho, R.O te, Postmaster te, O.C te khan min uap tlat a. Khatih lai tak mai khan kan Anganwadi zawng zawnga sem tur sikul dar ang chi hi kan kawl lai tak a ni hlauh va, kha'ng dar kha Ngopa Damdawiin Tlangah a rualin kan han vua a. A ri chuan a thleng thui vak lo vang, mahse kan phurna leh kan han tih velna lama kan thathozia kha ngaihtuahin a ngaihawm ta. Dar 51 kha YMA member phur deuh deuh hnenah kan sem a, pakhat mah bo thlau lovin kan hmu kim leh vekte kha ropui ka tih zawng tak a ni. Damdawiin Tlanga kan chho tur ka motor-a kan tlan chho, tlangval thathovin min han ṭawiawm kha chu vawiin thlengin ka la hlau. Kawng nalah ka sorkar jeep kawl, ZRG 1247 khan kan han tlan chho va, a duh duh khan a chesual thei ang tih ngaihtuah tawh lovin an rawn lawn chilh a. Special Second gear-in ka khalh a, a ṭul vaih chuan First Gear-a beng lut turin ka inringsa vek a. Khami ṭuma kan mei det leh ilo ai chuan, him dama kan chhuak kha chu vawiin thleng hian vannei ka la inti ta reng mai.

Kha YMA Golden Jubilee khan Ngopa YMA member ṭhahnem tak mai chu Lengteng tlang chhipah mei det turin an kal a. Lengteng tlang chhipa kalte chu tih mai mai a ni law, keini ang tan chuan nilenga a chho zawnga kal ngai a ni a, km 10 zeta hla a nih avangin a ngamin kan tum chhin ngam lo. Khati chung khan YMA member te kha intuam lumna tur puan tlem te te kengin, hmeichhe tleirawl deuh leh mipa te nen Pa Thlenga hovin (ni tain ka hria), sawmnga lai em maw ni thawk chho ta kha ni. Zanah mei an han det a. Anmahni Ngopa hovin an sawi dan tak a, ‘Pangang bukah’ khan an riak a. Mei an det zawh hnu chuan tihtur dang awm tawh hek lo, meipui aiin Pa Thlenga hovin zanah an awm a, chung lamah hmeichheho, hnuai lamah mipahovin meilum an ai a. An nui dur dur mai a. An nuih chhanah khan zahmawh lam a tel ka ring hnuhnawh ta tlat. Kha Pangang Buk kha eng dang ni lovin, Sericulture Department-in pangang khawi nana an in sak, a kánga sak, a chhuat thingphel, a chung rangva, a bang dap ni ta maiin ka hria. Kei pawh kan Lengteng tlang lawn tumin October thlaah ka thawhpui te nen kan han riak ve a. Zing dar thumah khan khawvela Chowkider hna tlin ber te zinga ka ngaih, Pu Rohnuna khan meizial ṭan tumin a meitalh a’n ṭan khauh va. Thawhphan awm miah lovin kan titi zui mam mam mai. A vawh deuh avangin kan mu nghet tehchiam lo tih chu sawi leh chuan a ngai lo.

Kum 30 chhung vel chu YMA Day hi chi hrang hrangin kan lo hmang ve ta a. Reiek khua te anga YMA Day nawmna khua chu Mizoramah hian a tam lo vang. Hmun danga ṭhalai awm bote pawh an khuaa YMA Day hmang turin an haw nal nal ṭhin ngai kha a ni a, tunah la ni zel tak maw.

Mahse tunah zawng, ram ngaih hla sa hlek lova YMA Day hman liamte hi a mak lo va, mak ti anga awmte hi kan mak ta viau zawk awm e. Keini ang rual tan chuan Tlawmngaihna Hlu te, Rual tin khumtu te, Kan Zotlang Ram Nuam te leh Sangha vuak hla chenin a ngaihnawm ṭhin a. YMA kalkhawmnaah na na na chuan ram ngaih hla han sak te hi tih awm tak nia kan hriatna leh, lunglenna hi a reh thei ngai dawn lo zawng a nih hi. YMA Day-a tualchhung fiamthu nena nuih dur dur leh, hnatlan leh ruaiṭheh leh ram ngaih hla sakho theihna hmun ngeia YMA Day han hman leh theih chu a chakawm mang e!