MIZORAM HOUSE HRALH THU

Kan sorkar hmasa, Pu Zoramthanga kaihhruai khan Kolkata Mizoram House, 24 Old Ballygunge-a awm chu an lo hralh fel titih der mai a. Sorkar thar a lo pian takah chuan Mizoram Chief Minister thar chuan India ram khawpui, a bikin keini Mizoram state te ang tana chhuahkâ, Kolkata khawpuia hmunhma neih a hlutzia hriain hralh an tumna chu sût leh tumin, Mizoram sorkarin a hralhna pawisa a dawn tawh te chu an pek let leh tak thu a rawn puang a. Kan lo lawm hman tawh viau a. Mahse sorkar tharin hralh tumna a'n sût leh tak chu High Court-in a pawm loh thu kan han hre leh a. Awmhmun aṭanga pawi ti taka thlirtu kan tam viau mai.

He Mizoram House hi tun hma, Salt Lake lama House kan neih hma zawng kha chuan Mizo zin veivakten kan pan ber a ni a, Kolkata khawpui lailai deuh laia awm a nih avangin a remchan pawh a remchang hle. Kolkata Mizoten puipunna'n leh eng ilo thila inhawrkhawm nan an hman ber leh, damlo inenkawl mekte tan thlenna remchang tak a nih vang pawhin a hrechiang tan chuan uiawm duh tak a ni reng a. Pu Talo Rosanga (RIP) pheiin thiam tak leh rim taka thawkin House Liaison Officer a nih lai khan, chhiah chawi tur chungchang buaipuiin lo ching fel lo se, he House hi tunhnu hian Mizoram ta a ni zel ang em tih ngaihtuah tham tak a ni. Mi fel leh taimate zara a thawktuten an lo hum hram hram; hetia Mizoram sorkar kal tain a lo hralh euh mai hi mak angreng tak a ni.

A thu hrimin Delhi a ni emaw, Silchar a ni emaw, Bombay a ni emaw, Aizawl pawh ni se sorkar hmun hma tiriral zawnga khawsak hi chu a fuh lo riau. Tuna kan Aizawl khawpui leh Aizawl ni lem lo, District Headquarters tam takah pawh hian sorkarin hmun hma a nei ṭha tawk lo hi kan buaina tak pakhat a ni ta reng a ni. Sorkarna chelhtu leh sorkar hnathawk lian ṭhenkhatten sorkar hmunhma humhalh ahnekin mahni tana pawh thlakte an ching a. Chu'ng chu hmun tam takah hmuh tur a awm a, kan hriat phakah pawh sorkar hmun anga kan ngaih ṭhin kha mimalin an lo nei ta fer fur mai. Khawi khawpui chhungah pawh sorkar hmunhmate chu tun dinhmunah a hlut tawh tehlul nen, India ram khawpui liana kan hmunhma neihsa hetia hralh mai hi a uitu kan tam viau. Kolkata-a Mizo awmte chuan Mizoram House hralh lohna turin awka te pawh an chhuah nghe nghe.

Kan sorkar kal ta kha eng emaw ti tak hian mipui lakah a inthlahrung lo angreng hlete pawhin a hriat theih. Ṭul bik thila hman tur, Restricted Tender-te kha a furpui tui hman hmiah hmiah mai a. Hmanhmawhthlak hauh lo leh thiamna bik ngai hauh lo; sorkarin hna a neih reng reng kha Restricted Tender tiin an duh zawng zawng an pe hmiah hmiah mai a. Mipui tihngaihna hre lo khan kan thlir liam mai mai lo thei lo va. Tunah Kolkata-a kan Mizoram House hmasa chu eng khaw sawi set set lovin a'n hralh leh ta pawp mai chu a nia. 'Hmun dangah a aia ṭha zawk din theihna turin,' tih thu angreng chu a awm. Mahse hmun danga chutiang hual thawm emaw, zawn thu emaw chu kan hre hauh lo va, chu bakah mar nalh angreng takin chutiang thu chu sawi mah ila, kan hmuh a rinawm lo ve thei viau.

He hmun hralh thu hi a hun laia kan Mizoram sorkara kan Minister ṭhenkhat khan hre ve tak ang maw? tihte a ngaihtuah theih rum rum. Chutih lai chuan he hmunhma hralh thuah hian kan Chief Minister hlui fapa, sorkara nihna engmah nei ve lo kha a inrawlh viau a. A lei tumtuten an lei theih nan a vir vel viau. An pafa khan Kolkata Mizoram House (Old Ballygunge-a mi) hralh thuah hian an tui viau ni ngei tur a ni. Chuti ni se Mizoram sorkar a nihna nei ve lo CM fapa kha eng vangin nge a inrawlh ve ang, tih ngaihtuah tur a awm ta. A hralhna pawisa lah fel takin sorkar kutah a lut a, ZPM sorkar thar khan a leitute kutah a pe let leh mai a ni si. Mizoram House hralhna pawisaah khan kan CM te pafa khan chanpual engmah an neiin a lang lo va, chuti chung chung chuan eng vanga Mizoram House hralh kha tuipui viau nge an nih tih ngaihtuah tur a awm.

Mizoram House an lo hralh fel titih tawh, lak let tuma tuna kan Chief Minister-in a beih a, a hlawhtlin mai theih lohna lah chu a hralhtu Party lam chuan mualphonaah an ngai a. An diriam zuite pawh ti ta hial ila, ṭawng kan duhthawh lutuk ang em? Mi tam takin Mizoram House hi lak let leh theih ni hlauh se kan tih laiin, kan Opposition Party leader chuan High Court thutluknaah khan Mizoram Chief Minister chu a mualpho tiin a'n han sawi a. 'Hnam Party' anga inlantir tum ṭhinte hian Mizoram an hmangaih dan hi mipui tam ber chuan kan hrethiam ta chiah lote pawh a tih theih ang.

Theih chu ni se, kan Chief Minister hian beisei tur a awm dek dek chhung chuan he Mizoram House hralh tumna hi sût leh tumin bei se la. Kan hlawhtlin hlauh chuan kan tu leh fate tan thil ṭha tak kan ti a ni ang. Thil ṭha zawk duh vanga he Mizoram House hi hralh anga kan sorkar hmasa hruaitute pawh an inlantir dawn chuan a hralhtute ngei khan, "E hei, helaiah hian ram ṭha tak mai, Mizoram House kan hralh tak aia chhenfakawm daih a awm a, kan Mizoram House hralhna pawisa khan a lei theih a, i lei zawk ang u," tiin sawi se la, hriatthiam a awl deuh ang. Mahse chutiang chu a awm kan hre lo va, kan CM hlui fapa kha eng vanga lo vir lo vir ve nge tih pawh kan hre lo va, eng emaw chu a awm a ni awm mang e a tih theih — chhan awm lovin hmawlhte pakhat pawh hi leiah a tla si lo va.