KAN SUL I HNU

Ka ngai mang e, tawnmang chang hnu, Khua rei ka dawn changin; Sikul run in hliap zar hnuai a, Zai tin kan vawr lai kha. A tlang a mual mah dang si lo, Ka thlir thin ni chhunah, Suihlung rualpui lenrual zawng khan, Raltiangah thlir ve maw? tia Hrawva lunglengin a sikul luhna thin hlui hlain mawi taka a lo au chhuahpui kha thinlungah a lo lo lut a.

November ni 29, 2017 chawhnu her tlai tawh lamah chuan sikul ka lo luhna ve thin, Venghlui Govt. Middle School lam pan chuan ka zu chhuk thla a, a chhan pawh eng dang vang ni loin, he sikul hi pawl ruk ka zir chhuahna a ni a, ka zir chhuah aṭanga kum riatna chiah, 1980 khan zirtirtuin ka thawk a, kum thum emaw lai ka thawk a, chuta ka thawhpui chutihlaia nula la ni, kan nula neih chhun ve te te Lalchuailovi chu pension-in a chhuak dawn a, sikulin an thlah a, min sawm ve avanga kal ka ni.

Tunah erawh chuan Venghlui Middle Sikul ni chung reng khan a awmna chu College Veng tih a lo ni tawh thung a, a sikul rangva in thin, a bang thingphel, a chhuat lei thin kha ram hmasawna kal zelah cement in a lo tawh a, a danglam zo tawh a, a ina chu a tha zawk pawh ni se, keini tan erawh a hlui zawk kha mitthlaah a cham reng a, a thar chuan lung a tileng ve mang hauh lo a nih chu. Sikul naupang leh zirtirtute pawh a thar vek an lo ni tawh a. An thlah ber kan nula pawh a lo la lutuk tawh bik lo a ni ang, a fanu pawh nula a lo hial tawh a, a lo rei ta a ni ber mai.

Mahse an Headmaster leh zirtirtute an fel em a, ka zu tlangnel tho mai. Zirtirtu kan nih laia kan Headmaster, Saizama Sailo (L), keini pahnih chiah tlangval kan ni a, kan inkawm ngei hle a. Lali chu dawhkan bawhin a muthlu a, a hnute si lo deuh hian Zama chuan a kut a han dawh a, a kut hnungah a chul a, ani Lali chu a lo harh a, Ka mumangah pawh ka la ngaizawng lo che, a tih vin hlur te kha mitthlaah a cham reng mai. Sikul naupang kan nih lai exam laia thingkunga lehkha kan zirna thinte kha chu a awm tawh lo va, tunah chuan thingkung thar a lo ding khup tawhin thlanmual a nih avangin lungphun a ding zing insi khup tawh zawk a.

Kan naupan laia ka sikul luhna, zirtirtua ka thawhna sikul hlui han fan chu lung a leng duh hle mai a, khua a lo tlai lam tulh tulh a, khawchhak lam Chalfilh tlang khamphei sei ruak kal pela sang tawh taka thla tiave aia lian tawh lo chhuak sang hle tawh ni la tla si lo avanga a en tur anga la eng lo thingbuk phen aṭanga min rawn en pho mai chu thlir loh theih a ni lo. Tichuan a thlahna thil tihkhawm an neih zawh chuan ruai kan theh a, puar taka kan ei hnu chuan riah ngawt thu awm bik suh haw a ngai ta a. Hmana mas urlawk zana u Thani te kawta chhang an deng, Zama nena chawltui ningzu kan in zawha phur taka kan denpuia kan den buakna lai te chu a lo danglam zo ta.

India President-in min rawn tlawh ni kha a ni a, kawngpui dunga a titawt khawpa motor ding khup thinte chu a fai duak a, ni tin lo kal mai se, tih mai hi a awl rum rum a. Tichuan motor jam nasa lutuk hmanhmawh leh hmawh lo inang pata kan din thuap a, varak no hruaiin min kal pelh zut zut lai, a changa thui lo te kan han tawlh leh hret thin vawi eng emaw zat hnuah chuan, hmana vantirhkoh van boruak sang tak aia hniama an rawn inlar a, van beram leh van sakawr var inlar sup sup thin avanga sikul naupangte pawhin lehkha an zir that hleih theih loh lai, inkhawih thluk rau lar lai vela keinin dan kan lo zir vena thin, Liandingpuia Law College, zan tin deuhtawha kan kal vena hmun Republic venga mi chu eng tin tin emaw kan thleng ve hram a, lung a leng duh hle mai.

A ina chu a la pangngai reng a, mahse dan zir thin zirlai puitling ni tawh naupang leh zirtirtute hmuh tur an awm tawh lo va, a chhungah chuan second-hand kawrte an lo zuar tawh zawk a, engkim hi a danglam zo. Khatia Mualpuia zan reh mi awm loh laia parda-a vantirkoh inlar kiks, a tuka motor nasa taka jam phah hiala an zu en hut hutna hmun lanna kan College thin kiangah chuan muangchangin kan ding a. Pu R.Thangkanglova chuan, zan reha mi awm lohna lai Mualpuia parda phena inlar ai chuan chhun pachangah mi tamna lai Treasury square-ahte hian vantirhkohte pawh hi rawn inlar se, kan en hut hut anga thlate kan lo la tur a nia, a ti. A dik khawp mai, mahse an zak ve deuh pawh a ni mahna.

Chutiang chuan kan sulhnu chu ka thlir thin a, lung a leng duh em em mai a, kum tawpa inthlah nana zana kal kan nih anga zana zirlaite nena ruai kan theh thinte chu mitthlaah a lo lang uar uar a, thla en zan tinzawnin chaw kan ei khawm deuh ber thin nghe nghe a. Chu College-a zir chhuak tunah hian Ukil pawh eng emaw zat an awm ve tawh a, Judicial Officers lah chuti tho chu a ni. A ni e, a tlang a mual mah dang si lo, ka thlir thin ni chhunan, han tih loh theih chu a ni lo ve. Zep thu a cheng lo, Dr. Rozama, IAS, Serchhipa kan Bawrhsap phei hi chu he College-a a kal lai, a ni e, a kal avanga nupui hmu a ni a, a zir hlawhtling kan ti.

A ni e, lei ram pela nun thar ngaia Lal nunnema hmaa tap tur mah ni ila, nakin hun la lo la awm tur ai chuan kan tun hma hun nun hlui kan sulhnute hian lung a tileng zawk thin a ni lo vem ni? Liandingpuia Law College leh Aizawl Law College kha a inchhun fin ta a, Mizoram Law College tih a ni ta. Chutah pawh chuan kan pem zui ve zel kha a ni a. Tunah chuan ama pualin hmun leh ram, building a nei ta, a lawmawm hle mai. Kan Law Minster Pu Lalsawta leh an Principal Rualkhuma Colney te thahnemngaihna avang a ni a, kan lawm em em a ni.

Hetianga kan rama dan zirna, Law College kan nei hi a lawmawm em em a, dante hi kan zaha kan zira kan hriat a pawimawh a ni. Dan ka lo hre lo a ni, tih hi chhuanlama hman theih a ni lo, tih kan sawi fo thin kha. Chuvangin a zir theite tan chuan i zir sup sup ang aw, amah Pu Thangkanglova bawkin, kan thlawhhmaah nghal rual in rawn chhuah a ni ngawt a lawm, ti thin mah sela dan zirin thalaite nghal rualah i awm sup sup ang u. Dan zawm leh zir hi i uar sauh sauh ang aw.