EMAU DAI REH

Amah pawh ka la hmuh hma hmain, in inang, te hi an ti fo a, lawm tur nge thinrim tur tih pawh ka hrethiam hawis lo va, mahse hman deuha Sikulpuikawna tlangval pakhat khawvela ka vawi khat hmuhnain phone hmanhawhah min dil a, Pu K.L. Lianding, min ti erawh ka lawm lo, P.L. Liandinga niin min hre thawi deuh hrim hrim kha ka haw top, mahse ka hmantir tho, ih in inang an tih fo chu maw, Emau kawng dai reh leh khawhar takah, Khualzin pahnihte khawhara an kal laiin, Tlai khua lo ngui, zan thimin a nang dawn a, Isua an sawm, tlai khua varpui turin, tih phuahtu Rev. Vanlalzuata hi mawle.

He khawvel ram zauah hian Rev. Vanlalzuata nen hian vawi khat chu kan inhmu ve tawh a, kan inchibai a, chu zawng chu a ni mai, beauty contest-ah chuan kan tel hmel loh dun viau. A pa chu Thangzuala a ni a, a nu chu Nuchhungi, 1953 September ni 24 khan Thinglian khuaah a lo piang ve nawlh a. Chhiahtlang High Sikula pawl sarih a zawh hnuin ATC-ah a kal a. 1975 khan Upa atan an thlang a, a kum lehah an nemnghet a. Upaa an nemngheh kum Khuangchawi thla ni 26-ah Thanzami nen an innei a, fa pawh panga an nei.

Lungpho khuaa Pastor a nih laiin, February thla a ni a, a la vawt vuk mai nghe nghe a, Inrinni a ni a, a tuka Sundei sikula naupangho hla zir tur a en kual dun dun laiin thli a lo thaw ta vuk vuk mai a. Ruahmal a tla phuar phuar a, tukverh a khar tur chuan bawng leh vawk, kelte in lam pana an tlan haw dum dum chu a hmu a, ran a te takngial pawhin an himna turin in lam pan nachang an hria a, keini a anpui ngeia a siam zawk mihringte hian kan himna tur Isua lam pan nachang kan hre ve si lo, tiin a ngaihtuah a.

A thinlungah Luka 24:28 lo langin chhiar tuma Bible a keu dawn lai chuan khi hla chang khatna leh a thunawn, ‘Kan hnenah awm ta che, khua a tlai dawn ta e, Tlai ni kawlah a liam dawn hi; Tlai khua i var za ang, Emau dai rehah hian, Chhun ni a liam, zan thimin min nang si,’ tih chu a thluk nen lam a thinlungah a lo lang a, a ziak nghal a, phuah zawm a tum a, mahse a pamṭul hlauh thung. Mahse a Bible chhiara Kleopa ten Lal Isua an sawm kha a han ngaihtuah a, tichuan chang hnihna leh chang thumna hi a dawng leh ta a ni. A phuah pawh a ni chiah lo, Lalpa pek a ni zawk mah awm e.

Khi hla khi, tun hma khan Pu Z.A. Kapmawia (L) leh Bungkawn nula Hliapi ten Radio-ah thiam tak maiin an sa thin a, kan ngaithlain kan hre hlawm awm e, mahse vanduaithlak tak maiin Pu Z.A. Kapmawia erawh chuan min kalsan ta. A ni e, Lal Isua hi riahpuia sawm lova mahni mut muta mu ta mai mai, Chawlhni zing Kristian tha pui pui hi kan Zoram khawvelah hian kan tam phian lo vang maw le?

A ni e, Emau dai rehah kher ni loin, Zoram hmun kilkhawr deuh leh bazaar lun laiah pawh, ruihtheih hian hmun a khuar zel ta mai chu a nih hi. Thlarau ruih leh motor ruihte hi chu a ziaawm e, dan ang pawha mana hrem ngawt theih pawh a ni chiah lo awm asin, zu rui aiin politik rui hi he khawvel lei anchhedawng ramah hian an hlauhawm zawk a, heng ISIS kan tih te, al-Qaida kan tihte pawh hi a nihna takah chuan sakhaw ruihchilhte an ni lo vem ni?

Rui pawh rui lo pawh, Emau dai reh a ni emaw ni lo emaw, tupawh dan kalha khawsa a, dan bawhchhetu chu an thil tihsual dana zirin Police Officer-in Magistrate hnen aṭanga man theihna thupek, Warrant an tih mai nei lo pawhin a man thei a, chutiang chu danah chuan a Sap tawng takin han sawi ve ngial ila, cognizable offence an ti a, cognizable case an ti bawk. A awmzia chu, entir nan, miin thil an ru a, case la awm lo mah sela kha rukru kha Police Officer-ten an man nghal thei a nih chu. Tin, rukruk case awm ta se, a rutu an hre mai lo va, a hnuah a rutu nia an ngaihte kha an man thei tihna a nih chu. Cr PC an tih mai angin hetiang thilah hian keini mimal pawhin kan man thei asin, mahse police hnenah pek vat erawh kan bat a ni thung.

Tin, non-cognisable offence leh non-cognisable case an tih mai hi a awm leh a, chutiangah thung chuan a chunga mi ang lo tak khian, Police Officer khan Magistrate hnen aṭanga thupek a hmuh loh chuan a man ngawt thiang lo thung a ni. Thil sual lian tham, tualthah, rukruk, pawngsual, in rawk tih angte hi Police chauh ni loin keini mimal tinte pawh hian man turin thuneihna Cr PC an tih mai chang 43-na angin kan nei tihte pawh hi i hre thar fo ang u. Mahse sawi tawh angin chutianga kan man a nih pawhin a rang thei ang berin thuneitu, Police hnenah kan pek vat erawh kan tihtur a ni thung a nih chu.