CHUNGU NUNGCHUNG BUK

Mizo politician zîngah chuan ka ngaihsan pawl tak Pu Vaivenga (fam) kha a dam lai, minister a nih lai ngei khan a pisa-ah ka kawm a. Ka chiang lutuk tawh lo na-in kan autonomous district council 3 zinga 1 inthlan zawh hlim, sorkarna an siam dawn lai vel a ni tih chu ka la hre reng mai. Chu ta Pu Vaivenga sawi chu, “Saw lama kan autonomous district council-te saw chu inthlan dawn a vote zawn ai-in inthlan zawh hnu, thlan tlinte hriat hnu a va campaign a hlâwk zâwk,” tih a ni.

Pu Vaivênga bâkah hian kan politician pakhat chuan “Autonomous district council a sorkarna siam túra inbúk lai hi chu ‘Chungu nungchung búk’ tum ang mai a ni a, a harsa lutuk. Han búk dawn ila, patla lehlamah an zuang thurh zeal, búk fuh tak tak a harsa a ni,” tih a sawi tawh a. A sawitu hi an inpuh kual deuh avángin tú ber nge ka hre bîk lova, dik erawh chu a dik chiang a. Autonomous district council 3 kan neihte hian zahpui-awm takin an lo awm tawh ṭhin tih erawh a tichiang hle a ni.

A bik takin Chakma autonomous district council (CADC) leh Lai autonomous district council (LADC) hi an zualkai awm mang e a tih theih. LADC hi inthlanna buatsaih a ni tawh a, naktûk hian vote chhiar a ni dawn a. Sorkar ngelnghet a awm dawn em tih chu kum 5 chhûng kan lo en ang chu. Tuna ding mek 11th LADC hi a chîrî khawp mai a. Kum 2020 a an inthlan khan bial 25 awmah MNF khan bial 20 zet an la a, chuti chung chuan an sorkar hotu ber Pu Manghmunga Chinzah chuan thla 8 vel awrh chief executive member (CEM) a chelh hman tihin kum 2014 bul aṭanga kum 1 tling lo deuh CEM nihna lo chelh tawh Pu V. Zirsanga chuan a thlâk ta a. MNF sorkar tho a ding na a, anmahni leh anmahni (hruaitu) an inpaihthla a ni.

Hei hian inpaihthlâkna a hring chho ta zel a nih kha. Pu V. Zirsanga hian LADC sorkar hi kum 2021 August ni 27 aṭang khan CEM dinhmun chelhin hruai ṭan mah se, eirûk thubuai-ah Special Court (Prevention of Corruption)-in kum 4 tâng túr leh cheng nuai 4 chawi túra a hrem tâk avángin a sorkar thlawptu zîngah hel an awm ta a. Nikum March thla khân thlâwptu a neih tam tâwk tawh loh avángin banna a thehlut ta a nih kha. Hemi hnu hian CEM nihna inchuhin an buai zui chho a, Pu V. Zirsanga hi vawi 2 a CEM a, Pu N. Zangura pawh vawi 2 bawk. A tíra hneh lutuka sorkarna siam theitu MNF lah chuan Congress nén (Congress CEM hnuaiah) sorkarna siamin a hnu-ah BJP CEM hnuai-ah sorkarna an siamho leh bawk.

Dik tak chuan LADC-ah hian sorkar dinglai tihbuai tum hauh lo anga insawi ZPM hian an tibuai nasa a, sorkar ngawr ngawr an tum avangin sorkar ngelnghet a awm thei lova. Hneh taka thlan tlin MNF lah chuan ZPM a sorkar loh theih dán tur ngawt an ngaihtuah ngar ngar a. Mizoram politics a an hmelma ber ṭhin, MDC pakhat chauh nei Congress pawh an thawhpui mai a. Khu lama NDA nihna a an zawmpui, Mizorama an thawhpui ngai hauh loh BJP MDC tlemte nén pawh CEM nihna pawh chang lovin an thawhpui-in an sorkar leh hreh miah lo a ni.

Chakma lam lah chu chuti hlauh chu an ni ve bawk a. Larsap-in thuneihna la-in tunah hian CADC hi sorkarna siamtu awm lovin a awm mek a. Nakum January thla bul thlenga sorkar ngelnghet a awm thei lova larsapin a ngaih chuan CADC hi ṭhiah (dissolve) a, inthlan ṭhat buatsaih mai a ngai dawnin a lang a. Autonomous district council dinna a dán hman India Constitution a Sixth Schedule-ah larsap hian thuneihna sâng tak a neih avangin a thú êm êm mai si a. Tuna kan larsap hi central a sorkar mek BJP hruaitu ṭhin leh union minister of state vawi 2 lai lo ni tawh a ni si a, ZPM-in sorkarna an siam ai chuan BJP sorkar-tîr hrâm dán túr a dap niin a lang tel bawk.

Kan autonomous district council-te an chîrí a, sorkar ngelnghet a awm theih loh chhan hi an hruaitu lawkte thiam loh a nih phawt a. A thû leh lal ber (CEM) nih an inchuhna avánga inpaihthla reng mai an ni ber. Hmana kan Law & Judicial leh District Council Affairs department enkawltu secretary Pu P. Chakraborty khan fiamthu titakin, “CEM post pakhat chauh a awm hi a buaithlâk a ni, CEM nih an duh vek hlawm si a,” a ti a nih kha. Thuneitu ber nih duhna avángin candidate a thlangtu political party leh anmahni thlangtu mipui pawh an zah zo lova, lal leh thuneihna atchilhna khân mi rinawm lovah a siam a. Chu chuan a hnam pum ang pawha zahawm lo leh mualpho-in an insiam a ni.

A dawt lehah chuan kan ADC-a thuneihna chelhtu apiangte hian vote zawnna atân district council hna hi an thei-sem a ni ber a. An council budget za zela 90 chuang hi hnathawk hlawhah an hmang an tih chu maw le. District council pakhatah phei chuan sorkar (council) hnathawk hi kal kim vek se pisa a ṭhutna nei lo an tam ngawt ang an ti. Inthlanna a tlin theihna atâna an politician-te’n hnam bil rilru an vawrh vak pawh hian Mizoram inpumkhatna a tiderthawng mek a nih hi.

ADC-a sorkar ngelnghet a awm theihna atân chuan an awmna political party an uiresan khapna dan (anti defection law) an neih ngei a ngai. An rilru (moral) siamṭhat theih a nih a rinawm chuan’ si loh avangin dán hmanga rinawm túra phuar an ngai a ni. Keini ang duang, dan (law/legal) lama hriatna nei thûk ve lo chu a tihdán túrah kan buai nghâl a. India danpui (Constitution) lam thiamte ka’n râwn kual a, a lo harsa viau a ni awm a sin.

An sawi dan chuan LADC-in LADC (Constitution & Conduct of Business) Rules, 2010 hmanga party uiresan khapna dán an lo siam ve ngawt kha an thuneihna phâk bak a ni ti-in Gauhati High Court chuan nikum October thla khân thutlûkna a lo siam tawh a. High Court chuan LADC leh CADC-in MDC-te’n an party an uiresan khapna dan an lo siam hi hman theih loh leh an thuneihna a ni lo, a lo ti tawh a nih chu. Hei hi a buaithlâk lai tak chu a ni. Mizo District Council kan neih lai pawh khan sorkar ngelnghet awm thei lovin an inpaihthla ve sek tho tih kha kan hre awm e.

Dan hre mite ka’n rawn kual a. Autonomous district council a mahni political party phatsan/uiresan khapna dan hman theih dán tur kawng khat chiah a awm niin an sawi a. Chu chu India Constitution Tenth Schedule siamṭhat (1985) kha Parliament-in siamṭhat belhin autonomous district council-te huamtir ve se tih a ni a. India Constitution siamṭhat vawi 52-na-ah khan political party uiresan khapna kha Parliament leh state assembly a member-te chauh huamtir a nih avángin tihdanglam leh a nih loh chuan autonomous district council-ah te hian party uiresan khapna dan siam theih a ni ve lo.

LADC bik pawh naktukah inthlan vote tla chhiarin result puan a ni dawn a. Pu Vaivenga (fam) sawi ang deuh hian MDC te inchuh campaign a inṭan leh ang tih a hlauhawm hle. MDC thlan tharte inchuhna (horse trading)-in bul an ṭan nghal mai ang tih a hlauhawm a, chutiang a nih chuan nihna leh thuneihna pêk intiam bâkah sum leh pai-a inthlêmna a thleng bawk dawn a. A bilhah a tho leh lo ang a, sorkar ngelnghet a ding thei lovang tih a hlauhawm hle a ni.

Eng pawh ni se, anmahni candidate-tu leh thlangtu bial mipui laka rinawm lote political party danga an pakai khapna dan siam mai theih a ni lo tih chu a chiang si a. Tun mai a tih theih awm chhun ni a lang chu ADC awmna a tlawmngai pawl, a bikin CYLA, MTP leh CYCA te leh pawl dangte bâkah an zirlai pawlte ṭangrualin an politics a lo thianghlim theih na’n thapui an thawh tal chu a ngai dawn a ni. Hnam anga mualphona vêng túra an ṭanrual phawt chuan an politician-te’n an namnúl mai mai ngam bîkin a rinawm loh – hlauhawm viau bawk se la.