ṬAWNG DANGA LUNGLÊN

Miin a thinlung chhungril ber, thumal uluk leh kawngkal fel tak neia a phuah chhuah sa poetry hi ṭawng danga lehlin khawlhzia leh khirhzia hre reng chung khan, kan college kal lai khan Mizo poetry Sap ṭawnga lehlin leh, Sap poetry Mizo ṭawnga lehlin te kha ka hrat ru hrep a. Mipui vantlang hmuh tura ka pho chhuah lem loh pawh a tam.

William Shakespeare-a sonnets zinga mawi bera an chhal ṭhin Sonnet No. 18 “Shall I compare thee to a summer’s Day” tih te, William Wordsworth-a “Daffodils” te, W.E. Henley-a “Invictus” te, Rokunga “Ro min relsak ang che” tih te kha ka han letling ve nawk nawk a. Ât-huai thiltih te pawh a ang thei mai awm e.

Kan Kristian hla ṭha deuhva ka ngaihho pathum pali vel pawh ka han khawih sil liam luam a. Rev Lianruma hla, ka duh em em “Ni tla ngai lo Zion Khawpui” tih hla kha ka hma hmasa ber a.

“Puan ropui sinin an leng tlan sate,

Ka tan hmun a awm ve chu ramah chuan,”

tih lai tlar:

“Where the redeemed throng robed

in glory abide,

There’s a place for me there beyond the tide.”

ti a ka lehlin lai te leh, Rev. Liangkhaia Hla “Thisen Hlu, Thisen Hlu” tih hla,

“Precious blood, Precious blood

that flowed on the rugged tree,

Saved me from sins and set all

the trangressors free,

What purged sin-stains away is

the precious blood of Calvary!”

tih anga duanga ‘rhyme’ ûm ru chunga ka lehhlin lai te kha ka la hre reng.

Kan Kristian Hla Bu chhuak hmasaah khan, “He dam chhung buaithlak takah hian” tih hla hi Tlanglawma phuah anga an tarlan avangin, Mizo irâwm chhuakah riak ka ngai a. Rhyme thlap lehnghalin ka letling a. Mahse, chu ka lehlinna chu phawrh lovin ka up vang vang a. Ka lo uṭawk tûr vawn lai chuan Kristian Hla Bu thar a lo chhuak a, Thangluaia hla lehlin angin an rawn dah leh ta si a. Ka tui ta lo va, ka kawl ṭâwl ta vel mai mai a ni. Tunah hian ka lehlinna chu han phawrh ka chak teh reng nen, ka ziahna note-bu hlui ka hmu zo mai tlat lo.

Kan Kriatian hla ṭha lehlin lama ka khurbin lai chuan, ka han ngaihtuah chianin hnam dang, sakhaw dang be hmaa han hlui atan chuan kan Kristian hla te hian literature lama thûkna leh mawina tehchiam an nei thei lo mai dawna ka hriat avangin ṭhuang dangah ka pakaisan leh ta a.

Zoppen Club International (Mizo Poet Play­wright Essayist Novelist Club) kan dihtirh phat

aṭang khan kan tum bulpui ber pakhat chu kan Zo-

ṭawng thu leh hla chhuanawm ve tak tak leh kan hranghluite kutchhuak hlu tak takte hi Vairengte gate he lama up bo hmuk reng lo hian hnam dang ram danga mite’na a thlumna an lo pawh ve theih turin Sapṭawnga let chhuakin hmun zau zawka thehdarh dan ngaihtuah ila tih hi a ni rem mai a.

Dik taka sawi chuan ṭawng lehlina hrim hrim pawh a hautak thawkhat tawh a; chu achhapah poetry tling phâk china ngaih poetry vêka lehlin lek phei chu hna awlai lo leh zuamawm lo tak a ni. Kan hla chai a ṭhat a, a ril poh leh a lehlin hna a hrâmin, a hautak ting mai ṭhin.

Hla phuahtuin ama ṭawng pâwl nêl ber hmangin, a ṭawngkam duh ang zanin, a ‘flow’ leh ‘rhythm’ mawikhai leh mawihnai thei ang berin, a duhthalin, lungthlu zanin a han chuktuah khawm a, chumi phur chhuak zo tura ṭawng danga, hla thu vêk lehnghala lo remchhuah leh chu thil zuamawm lo tak a ni a. Mi thiam filawr deuh nih loh vek pawhin ât sova tih mi chauh ni tein a lang.

Heti ang harsatna hi mi thiam hmasate chuan hmân hmânah an lo hmu dim diam tawh a; chuvangin, “Poetry hi a lehlin theih ngai loh,” an lo ti tawl tawh a; Italian-ho ṭawngkauchheh pakhatah phei chuan “Letlingtu, phatsantu i ni!” (“traduttore, traditore!”) tih hi zu awm mauh va! Ni e, ṭawng pakhat aṭanga ṭawng danga thu leh hla lehlin hian bothlau engemaw zât zawng a awm lo thei lo a ni ber. “Lost in Translation” tih film te hial pawh an siam kha.

Literature-a “creative writing” an tih ang chi, a thu leh hla lam rawngkai hi chu, “Chu chuan Sap-

ṭawng a thiam lutuk,” ti a lehlintir mai chi a ni ve hlek lo va, sawrkar lehkha leh lehkha dang ang a ni ve lo. A ti mi, a rau chang, a “ngaihna hria”, literature lama mit keu chin, ṭawng pahnih thiam kawp ṭha tak, a ziaktu lu bur luhkhung thei, an rilru ang pu mi, mi bik nih a ngai. Doctor kutziak damdawi zuarin an chhiar thiam bik riau ang hian, ziakmi “hawrawp” lo man fuh thei riau nih kha a ngai a ni. Sapṭawng leh Zoṭawng thiam mi nazah zawng tih mi a ni ve lo.

Kan pawl hmachhawp “ṭihbaiawm” tak chu han bikbosan dawn ila a founder secretary te kan lo ni ve laklawh tawh bawk si a. ‘Sap sikul chhuak ngat, “Vat a vandarphul and phasunabal veding” (What a wonderful and fashionable wedding!) ti ṭhin South Indian Lengi leh Valate zirtirna pûm aṭanga chherchhuah ngat ka ni lo em ni?’ ti a tuang tichhah luiin zawhtê chu darṭhi awrhtir ve ka tum ta poh a.

Lalmama hla “Virthlileng” te, PS Chawngthu hla “Sam ang ka ṭhen hnu” te le L.Biakliana hla “Hmangaihna Dik” te ka han letling ta zawk a. Kan Mizo hla phuahtute zinga poet tlinga ka ngaih leh ka dah sân ṭhiau an ni hlawm bawk a, mahni insit tak chung siin nuam ka ti hrep. Lalmama hla leh L.Biakliana hla chu anmahni hla kalhmang angin ‘rhyme scheme’ awmin ka dah ve a. He’ng hlate hi Sahitya Akademi chanchinbu (bimonthly journal) India Literature No. 201 Jan-Feb 2001-ah an chhuah nghe nghe a; cheng 3000 chuang min hlawhtir a ni (a hun lai kha chuan tlem chhe lem lo tak a ni). He’ng ka hla lehlin pathum bakah a hnuah pawh hla eng engemaw chu ka letling zui ve leh a. Chu’ng zingah chuan, Rokunga hla “Harh la, Harh la” tih te pawh kha a tel a ni.

Mahse, chu kan pawl ZOPPEN Club chuan pawl dang chin dan ang bawka mahni duhsak zawngte saruh thehthlaksakna hmanrua, award siam leh sem a buaipui tâk aṭang khan ka tui zui ta lo a ni.

Chutih hun laia Mizo poet dam lai zinga ka dah san ber pawl, Lalzuahliana, makna phêna takna zawngtu poetry pawh hi ka letling ve nual a. Ani poem hi chu khawchhak film, a subtitle tel lo emaw, Mizo ṭawnga dub loh emawa en ang maia hriatthiam harsa a ni ṭhin.

Chu’ng a poetry ka lehlin zinga pakhat, 9. 4. 1998-a ka lehlin, khawiah maha ka la publish loh hi, a Mizo ṭawng nen ka han phawrh ang e.

NUNNA TÙR (THIHNA)

Chung ván boruakah zén khu a kai a,

Vaivut khu-ah thisen a zâm,

Sakawr leh tawlailir an in-ûm a.

Silai leh laipui an insai awn awn a.

Thli-ah thihna a lo lêng a,

Thlivirin túr a virpui a.

Kan tlu a, an tlu a,

Kan ral a, an awm tawh bik lo.

Thiamna-in thihna a hring a,

Finnain thlaphanna;

Theihnain râwnna a thlen a.

Ropuinain hlauhna.

Inhmangaihna avangin huatna a awm a,

Hausakna avangin retheihna.

Zingah huatna nen kan ṭhangharh a,

Zanah pulh puk pukna kan ngaihtuah a.

Hlimna zawngin buainaah kan lut a,

Kan chhêk in-in min chhan zo lo.

Awmze nei lovin thisen a luang a,

Tum awm lovin kan ral zo ang.

Inhmuhmawh nán in a zîm a,

Insual nân tual a zawl lo.

Innghirngho nân ram a tê a,

Indo nân khawvel a zau tawk lo.

Inremnain in a zauh va,

Lainatnain tual a tirem.

Muannain ram a siam lianin,

Hmangaihnain khawvel a hneh ang.

THE POISON OF LIFE (DEATH)

The air above us is charged with gunsmoke,

The dust of the earth is spilled with blood,

The horse and the cart are chasing each other,

The guns and the cannons firing one another.

Death is blowing with the wind,

And the whirlwind carries venom.

We stumble; they fall,

We vanish; they too are no more.

Knowledge begets death;

Wisdom gives birth to vexation;

Power breeds terror.

Because of love there is hate,

Because of wealth there is poverty.

In the morning we are awakened with enmity,

At night we rack our brains for

the devastation of mankind,

Seeking for happiness we lure ourselves

to destruction,

Our granary can save us no more.

Blood is flowing without any reason,

And we will perish without aspiration.

The house is too small for hatred,

And the fields are too rugged for fighting,

The land is too limited for violent disputation,

The world is not big enough for waging war.

Reconciliation widens the house,

Kindness smoothens the field’s surface,

Peace broadens the land,

Love will conquer the world.