Aizawl FC fan ruhkawl

Aizawl Football Club (AFC) ṭan thu-ah maw? Duh tak awm ta lo Zomuanthanga te, Padinga te vanglai ata tawh, zahpuiawm khawpa an fan ruhkawl ka ni ve asin.

Brigade Field, Bawngkawn-a MAP nena an inkhelh te pawh khan, sikul ban veleh, ka chhun ei tur leina tura ka pawisa pai Rs 5 khan Aizawl chhim tâwp aṭangin Aizawl hmar tâwpah bus chuangin, khaw chhe karah ka va en ve vang vang asin.

Officials leh an team crew bâk entu mipui chu keimah chauh kha ka ni a. Hmui duk chura khûr bap bapin ka va en ve ngei alawm. Khatih laia football lama Goliatha MAP kha an hneh thei lo êm êm mai lehnghal.

Ṭhenkhat chuan mak in ti mai thei - football ka tuichilh luat vang khan kan veng YMA chanchinbu-ah class 9 ka nih laiin sports column ka ziak ṭhin a, chuta ṭang chuan luiterature lamah ka lut ta daih alawm! Mi nuih kan tiza em lo ang a, Messi te hi chu kan inkhelh peih loh hnua rawn inkhel ve chauh alawm an nih!

Chutiang mi, naupan lai aṭanga football ngaisang chu ka nih avangin MFA hnuaia first division club panga an awm lai khan an inkhel khan min ko tlat a, kei lah nula buan chak lo an sawi ang maiin ka awn leh ruai ruai ṭhin. Khelmual lam panin ka inher vut a, ka pheitum lian hian he ka taksa chak lo hi khelmual a thlen leh nge nge
ṭhin. Laldenga Gold Cup te kha match pakhat mah ka hmaih lo hial em aw?

Chu'ng lai chuan Aizawl Football Club fan ruhkawl ka lo ni daih tawh a, hmui duk chur khawpa ka ṭan hnu an ni. Chuvangin hetia an han intuai thar leh te hi ka lawm a, vawiinah Mizote ennawm leh en rawn an han ni ta mai te hi, kan fit ve deuh lai ni se ka bawp hi ka beng thlenga vawi sarih hmun sawmsarih khaikhan tak a nia ka nap ni!

Break a leg, Aizawl FC, I’m still rooting for you!

Sipai chhuṭhi

Kum 1940 chho, Mizorama sipai to vanglai, nulate ît rawn, tlangvalte thîk rawn, nu leh pate’na makpa rangkachak atana an chîk rawn an nih lai kha a ni a.

An rawn chhuṭi hawn a, nula an han rîmte khan an sipai thuam (uniform) famkim nen khan an induang zar zel a.

Nawhalh pawh hmuh zen zen tur a awm loh lai, ṭhenawmte mei an fawhkai mai mai hunlai kha ni mah se, anni kha chuan lungthu tlawhchhan khan sakawr-lu-chuang nawh-alh khan Zozial pawh ni lo, Charminar cigarette ngat, filter loh kha an ṭan zit phar phar reng a.

Ha nawh nan paw’n mi tam berina meihawl an hman laiin, anni kha chuan, mi feh tur kal tam lai tak khan, pâwn lêrah, tâwnzau ha-a towel tê bâtin Colgate toothpaste ngei mai khan hâ an han nâwt phuan suah suah a. Inchhungah radio ring takin an han zaitir ngei bawk a, ngaihsan loh kha an har dawn em asin!

He painting hi tu ziah nge ka hre lo, khatih hun lai boruak kha a pholang chiang hle-in ka hria a. Zaithiam Elijah Rintea, Sangtea Ronald, Henry Vangchhia te pa Pu Dominic Lalhmangaiha ina intar thla ka lâk a nih hi.

Hetah pawh hian kan sipai chhuṭi hian khaw khat nula hmelṭha ber puantah lai khi a chhûn rim niin a lang a. Mite’na an hmuh loh hlau takin a sana pawh a tih-lan khi. A bula ṭingṭang perha lo zai ve tan khi chuan beisei a bo ve duh khawp ang le.

An fanu phalrai lutuk anga lan chu ṭha lovin a hre ve deuh a ni ang, pa berin ṭul mang lovin an bulah êm a lo tah ve kar khi; a tupa khian dilchhût takin thil a lo zawt ve sek bawk a.

Mitdel pathumte nen

Vawi khat chu mitdel pathumin an magazine “Mitdelte Khawvel” tih min rawn zawrh a. An hriatna chakzia kha mak ka ti tawp thei lo.

“Ê, kan lei anga a ni mai alawm,” ka'n tih khan, a rual deuhthaw khan “Pu Mafa,” min tizui ṭhap thei nia. “Engati nge comedian search-a khan i ṭhut tak loh, i comment kan lo chang nasa thei asin,” te kha min ti luam a. Comedian Search hnuhnung berah khan damlohna (diabetic peripheral neuropathy) avanga ka ṭhut theih loh thu-in ka chhang a. Kan inkawm bawrh bawrh a.

Rs 20 tlang ka pe a, pakhat khan a kawrhma iptê-ah a dah nghal a. “Rs 10 a nih kha ka pek che u, bum in va’n nuam dawn tak,” tiin ka’n fiam zui zat a. A kawrhma iptê aṭang chuan ka pawisa pek chu a han phawrh a, a zût a, “Rs 20 a nih reng hi a,” a ti a.

An nui tlang hak hak hlawm a. Anmahni chantawkah an lungawi hmel êm êm mai a.

Anni ai chuan mitdel ni si lo, chanvo, nihna leh, sum leh pai ûmna lama khaw hmu lêk lova che ṭhinte hi an khawngaihthlak zawkin ka hre ta hial a; khawngaih thla erawh an la mawlh lo thung.

Mit khaw hmu ve si a, thinlung del tlat, mahni bulhnaia mite na tuar, rah beha awm, silhfen leh ei tur tlachhamte, hleih neihna leh hleilenna, leh tanpui ngaite hmu thei si lote hi mitdel chu an ni ber zawk lo’m ni le, ka tih phah ta hial a.

Lalpa, i laka vui a, ka phunnawi changin min ngaidam ang che. Khaw hmuh theihna mit pahnih ka nei a, khawvel ka ta a ni.