ENG VANGIN NGE APOLOGETICS HI TUN HUN ATAN A PAWIMAWH?

Tunlai hun, internet leh social media hmanga thu thehdarhte a nih ang anga ei ral mai lova thudik a nih leh nih loh finfiah ṭul tihna (digital skepticism) a len hun lai, sakhuana laka inlak hranna a san hun lai leh, khawtlang nun zir chiangtu sociologists-ten ‘Rise of the Nones’ an tih, sakhua bik zawm duh lohna rilru a pun mek lai hian, sakhaw zirtirna leh hriatna aṭanga tunlai thil awmzia sawifiahna (apologetics) hi a hlawk zual a, a pawimawhna a lang chho telh telh dawn nite pawhin a lang. Khawvel hmun hrang hranga zirchianna (research) thar lo awmte aṭanga a lan danin, apologetics hian sakhaw inbeihna satliah aṭangin a pianhmang a thlak a, tunlai mite (a bik takin ṭhalaite) tan rinna kawnga puitu leh hmasawnna thlen thei thil a nih theihna turin, tunlai mite awm dan leh nunzia nena inmil taka hman ṭangkai a ṭul chho telh telh tawh dawn a ni.

Kum tam tak chhung kha chu apologetics hian mite ngaihven a hlawh tawk loh avangin harsatna a tawk ṭhin a. Mi tam tak chuan inhnialna atthlak ang lekah ngaiin, chhandamna kawng zawhna atana thil ṭul lo leh hlauhawm ang hiala ngaite pawh an awm tawh ṭhin a ni. Mahse, zirchianna tharte aṭanga a lan danin, hetiang ngaihtuahna hi thil nih phung hriat chian hmaa ngaihdan lo siamna mai niin, khawvela sakhaw duh lohna leh pawm lohna lama zalenna ṭha lo a pun zel laia lo hnawl ringawt hi a hlauhawm thei a ni.

KALPHUNG THAR A ṬUL CHHAN

Mihring nunphung zirchianna (demographic trends) hian apologetics ṭha tak neih pawimawhzia a tilang chiang hle. Kum 2022-a Singapore rama forum pakhat chuan, an ram Census 2020 data an chhuinaah, an dinhmun lungngaihthlak tak a tarlang a. Kristianna chu chawhrualin pung angin lang ve tho mah se, ṭhalai kum 25–44 inkar bikah Kristian tia inchhal nasa takin an kiam a. Ṭhalai lam hruaitute chuan sakhuana hian mi fing leh lehkhathiam te a hloh a ni, an ti a. Nula leh tlangval tam takin sakhuana chungchangah chian lohna leh rinhlelhna an neih avangin buaina an tawng a, Kohhranten chu buaina chu engtianga enkawl tur nge an hre lo, tih an sawi.

Hetiang ngaihdan ang deuh hi khawthlang ramah pawh hmuh tur a awm a. Kum 2025-a Liberty University-a zirchianna chuan, apologetics hman dan, ‘classical’ leh ‘evidential’, tun hmaa Pathian Thu hril ṭhin dan pangngaite hian zirlaiteah tel peih lohna leh tui lohna (disengagement) a thlen tih a tarlang a. Zir chiangtute chuan, hetianga inzirtirna kalpui a nih hian, sakhuana ngai pawimawh tawh lo ṭhalaiten (secular youth) khawvel kal phung leh nunphung pangngai ni tura an lo ngaihruat (cultural assumptions) te leh, rilrua ngaihtuah dan an lo neih lawksate (presuppositions) chu a hneh thei lo ṭhin tih an hmu chhuak a ni.

Chutih rual erawh chuan, he zirchianna hian thil mak tak hmuh chhuah a nei a. Zirtirtuten thil nih phung, a bul thum aṭanga an zirtir a, hriatthiamna tak tak pe tura Pathian Thu an sawi hian, tunlai ṭhalaiten sakhuana tel lova ngaihdan an lo neih, kalphung pangngaia an lo pawm tawhte chu a rawn hnawl a. Chu chuan Kristian rinna lamah ngaihtuahna thar ṭha zawk a neihtir a, tel ve chakna an rilruah a tuh chho nasa hle tih statistics-in a tarlang.

ZIRNA IN AṬANGIN KHAWVEL PUM HUAP

A hun leh hmun nena inmil zawka inzirtirna (contextualization) hian tunlai zirchianna (contemporary scholarship) -ah hmun pawimawh leh thuk tak a luah a. Benno Van Den Toren leh Kang-San Tan te lehkhabu, ‘Humble Confidence: A Model for Interfaith Apologetics’ tih kum 2022-a tihchhuahah chuan, “Tun laia kan awmna khawpui lian tak leh sakhaw tam tak inchiahpiahna, hnam chi hrang hrang awmna hmunah hian, Pathian Thu kan lo hril ṭhin dan tam takte hi a hman tlak vek tawh lo,” tiin an sawi.

An sawi zelnaah chuan ‘Holistic Apologetics’ (mihring pumpui huap hrilhfiahna) hmangin mihring chu an thinlung, an inpekna, an ngaihdan leh ngaihsak zawngte hrethiam chunga Kristian zirtirna pek tur a ni, an ti. Tun hmaa kan lo tih ṭhin ang a, ringtu ni tura miin thutiam an siam theih nana beih vak chauh a tawk tawh lo tiin, inbiak tawnna (dialogue), hnam leh nunzia inhriatthiamsakna (cultural sensitivity) leh thuhriltuten, a hun leh hmun hrethiam chung a, taksa leh rilru zawng zawnga thu an sawi pawimawhna an sawi bawk. Tirhkoh Paula entawnin, Pathian Thu hriltute chuan Chanchin Ṭha an puanin, an awmna hmunah taksa leh rilru zawng zawng nen an awm ang a; an zirtirte chu mahnia nun hrang nei vek an ni tih hriain, an nunphung, an inlaichinna, an khua leh tui nihna leh an khawtlang nun nena inmila Pathian Thu hrilhin, an awmna hmunah an va pan tur a ni, tiin an sawi.

DIGITAL RAMTHAR

Digital platform hi Pathian Thu hmanga inbeihna hmunah chak takin a inlet chho mek a. Nigeria rama zirchianna (2024) pakhat chuan ‘digital apologetics’ hman chhoh dan a en a. Mi tam takin social media chu Kristiante rinna beihna atan an hman ṭhin laiin, Nigerian Catholic mite zingah digital platform hmang veka an rinna veng himtu an tam lo, tih a tarlang. He zirchianna hian Kristiante chu thil thlengte puan chhuah chauha duh tawk lovin, digital lamah pawh, engtik lai pawha a ṭangkai zawnga inbiak tawnna (constructive digital dialogue) siam thei tura inchher hriam pawimawhzia a lantir a ni.

RILRU LEH THINLUNG HNEHA ZIRTIRA SIAMNA

Chuti a nih chuan, he apologetics hi engtianga kalpui tur nge ni ang?

A hmasa berah chuan, apologetics hi zirtira siamna (discipleship) nena inzawm tlat a ni. Mi fingte tan bik chauha zir theih a ni lo va; mi, rinna nei zawng zawngte tan rinna siam puitlinna (faith formation) hi a tum bulpui a ni. Barna Research aṭanga a lan danin, tuna kohhran kalphung pangngai hian a chhunga seilian ṭhalaite hi, tun lai khawvela harsatna an hmachhawnte lakah, a veng him zo vek lo niin a lang. Apologetics chuan ringtu ṭhalai, hmangaihna, finna leh huaisenna nena an rin chhan puang chhuak thei siam chhuah hi a tum a ni. Hetiang zawng hian Kohhran pawh hian hma thar la sela a duhawm hle.

A pahnihnaah chuan, apologetics hi chik taka thil chhuina, thiamna leh finna a innghat ni mah se, mite mamawh dan a zira thlarau lama inkaihhruaina a ni tel a ni. Indonaah hian hnehtu nih ringawt a tawk lo va, mipui thinlung hneh a ngai tel ṭhin. Chutiang bawk chuan, sakhuana chungchanga inhnialnaa hnehna chan mai a tawk lo va, rinna kawnga buaina tawkte hnena hriatthiamna pek a ngai tel tlat a ni.

Tunah chuan, tun hmaa Academic library chauha awm ṭhin, Kohhran leh rinna chungchang thuziak pawimawh tak takte kha Kohhran mite tana hmanraw pawimawh anga hriat a lo ni ta a. Mihring nuna zawhna pawimawh tak tak (existential questions tia sawi ṭhin) – Pathian awm leh awm loh te, thawhlehna te leh sual ṭobul chungchangte chu zirchianna tam tak tihchhuah a lo ni tawh a. Heng lehkhabute hian ṭhalai, khawvel thiamna lama fing tak tak, rinna kawnga buaina tawk mek site hi ngaihtuahna ṭha zawk a pe thei dawn a ni.

A tawp berah chuan, apologetics hi inngaitlawmna rilru aṭanga lo piang a ni. Tunlai khawvel ṭhang chak tak leh sakhaw tam tak awmna hmunah hian, apologetics-in a tum chu, tute emaw zawhna zawng zawng chhanna leh finfiah pek lam a ni lo va, mi rilru thlak thleng thei, Pathian Thutak (Truth) lama sawm hi a ni zawk a. ‘Apologetics for an Ever-Changing Culture’, kum 2025-a lehkhabu chhuahin a sawi angin, apologetics hi inlaichinnain a khalh kal a ni a; Pathian chawimawina leh mi dangte hmangaihna atan a ṭangkai em em a ni.

- R. Lalbiakzuala