TUM HLEN CHHUAK ZIRTIRTU/HRUAITU

Kum 2024 kan chuang kai a, kohhran hrang hrangah mawhphurhna leh chanvo a inthlak seng sung a. Naupang enkawlna bikah Sunday School, Pathianni Tleirawl Inkhawm (PTI), Pathianni Naupang Inkhawm (PNI), Kristian Naupang Pawl (KNP), Children for Christ (CFC), YP (Young People) Corp, Corp Cadet, Sabbath School, Children Ministries, Adventist Youth & Junior Youth hruaitute leh zirtirtute zingah ṭhenkhat chawl tate an awm laiin, ṭhenkhat hmun danga sawn, ṭhenkhat ruat tharte kan awm a, kohhranah rawngbawlna bul kan ṭan leh mek a ni.

Zirtirtu/hruaitu ni tur hian mi ṭha leh entawn tlak kan nih avang te, nihna leh dinhmun avang te leh mihring indaih lohna avanga ruatte pawh kan awm thei ang. Chuvangin, mawhphurhna kan lo dawn sawnna rilru a inang lovin kan pawm dan pawh a inchen lo viau thei. Ṭhenkhat tan thil lawmawm tak anih laiin ṭhenkhat tan phurrit a tling thei ang a. Kum 25 leh a aia tam zirtirtu a zawna ṭang tawh, chawimawina hial lo dawng tawhte leh ruat tharte rilru put dan pawh a inang lo thei viau awm e.

Kohhran leh Sunday School committee kaltlanga zirtirtu/hruaitu ni tura Pathian ruat kan ni a. He rawngbawlnain a tum hlen chhuak zirtirtu/hruaitu kan nih theihna atana hriat tur pawimawh tlem han tar lan kan tum dawn a ni.

RAWNGBAWLNAA CHIAN: Naupang Sunday School zirtirtu leh hruaitute hian tun aṭanga kum sawm sawmhniha kan kohhran hruaitu tur kan chher mek tih hi kan hriat hmasak a ṭul hle. Kohhran ban nghet tak chher chhuak thei tura taimak chhuah a pawimawh tak zet a. He mawhphurhna pawimawh tak kan kova innghat hi hlen chhuah a ngai a. Chumi tur chuan, inpekna leh tum ruhna thar nen bul kan ṭan chuan, Lalpan chakna min pe zel dawn a ni. Vawiina kan rawngbawlna hian kohhran leh kan ram dinhmun a nghawng dawn avangin kan mawhphurhna a sang hle tih hi kan hriat a ṭul hle.

THIL TUMA CHIAN: Sunday School zirtirtu leh naupang pawl hruaitu atana ruat kan nih hian, chu’ngte chuan eng thil tum nge a neih kan hriat a ngai a. Kum tam tak pawl thil tum hre lova a hruaitu nih hi thil theih tak a ni. Kohhran huang chhunga committee peng hrang hranga tel tan phei chuan hriat pawlh nawk pawh thil awl tak a ni a. Sunday School, PTI, PNI, KNP, CFC, AY, YP leh a dangte thil tum hi zirtirtu leh hruaitute hian kan zir a, kan ennawn fo a ṭul hle. Thil tum hriat loh leh hriat pawlh hian nghawng ṭha lo zawk neiin rah ṭha a chhuah thei dawn lo va, kan naupangten an zir tur an zir chhuak thei dawn lo a ni. Mawhphurhna kan chelh tam tak zingah zirtirtu/hruaitu nihna hi kan ngaih pawimawh ber (priority) zingah tel se la, a tum kan bel thei dawn a ni. Eng kawngah pawh kan entawn ber tur, Zirtirtu Ropui ber, Lal Isua khan, Pain mawhphurhna a pek a kha a hre chiang em em a, Johana 17:4-ah chuan, “Nangin thil tih tur mi pek kha ka ti zo,” tih kan hmu a, a hlen chhuah mai piahah a zo ṭha tih a chiang hle .

Kohhran tina Sunday School-te hian thil tum ṭha tak tak kan nei a. Mizorama kohhran lian pahnih Sunday School thil tumte han tar lang ila (kohhran dangte pawhin kan pawl tum lo en ve ila):

Heng Sunday School thil tumte hi an pawimawh em em a, kan kova innghat mawhphurhna hi a ropui tak zet a. Amaherawhchu, heng thil tumte hi kan tihlawhtling thei ang em le? Kan theihnain a tlin lohzia a lan chian em em rualin zawmthaw taka thawh chi a ni lo tih erawh kan hmuh thiam a ṭul hle mai.

Zirtirtu/hruaitu mawhphurhna hlen chhuak tura pawimawh ni-a langte han tar lang leh ta ila. Zirtirtu/hruaitu chu:

A piangthar tur a ni: Johana 3:5-ah chuan, “Isuan a chhang a, ‘Tih tak meuhvin, tih tak meuhvin ka hrilh a che, mi tu pawh tuiah leh thlarauva an pian loh chuan Pathian ramah an lut thei lo vang,” tih Bible-ah kan hmu a. Midangte zirtirnaa thui tak kal tawh, Judate zirtirtu, sakhaw thurin lama mi ril tak Nikodema meuh pawh khan, a nunah tlakchham a nei tih inhriain, zanah a rukin Isua a pan tlat mai! An inbiakna aṭanga thil lang chiang deuh mai chu, piangthar hauh si lovin mawhphurhna a chelh theih tih hi a ni. Kristian nun bul inṭanna laimu chu Thlarauva Piantharna a ni a. Kristian chhungkuaa pian vang ni lovin, piantharna dik tak changa naupang enkawl tur kan ni.

Pathian ṭih mi a ni tur a ni: Exodus 18:21-ah, “Chu chang chu ni lovin, mipui zing ata mi hmantlak deuh deuh- Pathian ṭih mite, mi dik takte, hlawkna dik lo tak haw mite - thlang chhuak langin: chutiang mite chu sang pawl chunga hotuah te, sawm pawl chunga hotuah te ruat langin,” tih kan hmu leh a. Thuthlung Hluiah pawh hotu/hruaitu atana Pathianin hmantlak a tih, a duh zingah Pathian ṭih tute an lang hmasa ber a ni. Zirtirtu leh hruaitua ruatte hi mi piangthar ni-a inngai kan ni vek hlawmin a rinawm a, mahse Pathian ṭihna tak tak kan nei em tih erawh mahni kan inzawh a pawimawh hle mai.

Kan ram hi biak in lama Sunday School leh naupang enkawlna nei ṭha, kohhran activities nei ngah em em ram kan ni a. Chu’ngte belhchhah turin, khawtlang inrelbawlna ṭha tak nei kan ni bawk. Amaherawhchu, chuti chung chuan eng vangin nge kan ramah sualna hrang hrang a zalen em em reng si le? Kan hmingthanna mawi lo leh zahthlak tak takte hi engati zozai nge ni le? Pathian ṭihna tel lova kan kal thui tawh vang a ni ngei ang le! Hla siam tuin, “Ka tih ṭhinte ka tih a rem tawh lo, ka tih ngai lohte tih a ṭul zawk a,” a tih ang khan, mahni zawn ṭheuhah kan tum hlen chhuak turin, Pathian hnena inhlan thar chungin, A ṭanpuina nen bul i ṭan thar ang u.

A zirtir anga nung mi a ni tur a ni: Sap ṭawngin, “Walk the Talk/Talk the Walk,” an ti a, zirtir anga nun mai piah lamah a taka kan lo nunpui tawhte kan zirtir a pawimawh hle. Tunlai naupangte hi an fing em em tawh a, cyber world-a cheng an nih miau avangin, an kutah khawvel an hum a ni ber tawh. Chhungkaw tam tak chu in chhungah kan buai mek laiin biak inah inkaihhruaina leh inzirtirna ṭha tak kan nei hi a lawmawm hle. Darkar tlem te chauh lo zirtir pawh ni ila, kan zirtirna hian an nunah danglamna a thlen thei tlat a ni. Chu erawh keimahni theihna ni lovin, Pathian Thlarau Thianglim thiltih theihnain a ni. Kan zirtir ang kha kan nunah an hmuh hmasak a, thinlunga thlarau bo hmangaihna tak tak nena enkawla zirtir kan nih phawt chuan, kan zirtirnain rah ṭha a chhuah thei dawn a ni. Hla siamtuin, “Miten min chhiar, min thlir reng e; ka awm dan zawng zawng an hai lo, Krista nun mawi leh Chanchin Ṭha keimahah hian hmuh an chak ṭhin,” a tih ang khan, Krista nun mawi lan chhuahtirtu kan nih theih a va pawimawh em!

Hma thlir nei ṭha mi a ni tur a ni: Hma thlir nei ṭha chuan resource a ko khawm a, hmasawnna naupangte milin a thlen a, a zirtirnain thuk zawkin awmzia a nei thei a ni. Hman aṭang tawhin, Sunday School zirtirtute hian zirlai bu enin an zirtir mai ṭhin a, tih vak ngaihna dang kan hre ṭhin lo. Tunah erawh chuan, khawvel thiamna ṭhang chak lutuk ruala awmze nei zawka zirtirin, hmanrua leh thiamna chi hrang hrang hmang ṭangkai a, kaihruai tura hma thlir neih a pawimawh hle.

Naupangteah a ṭha zawngin danglamna a thlen tur a ni: Isua hi danglamna thlentu, ‘Agent of Change’ a ni a. A dam lai mai ni lo, vawiin thlengin mi tam tak nunah danglamna a la thlen a ni. Isua anga mi famkim ni lo mah ila, entawn tur min hnutchhiahte nunpui a, hmangaih taka, chatuan nunna an neih ngei theihna atana kan zirtir chuan, naupangten an duh thlanna ngeiin Isua hi an thlang ang a, an nunah danglamna a lo thleng dawn a ni. Tichuan, zirtirtu nihna ropui ber, Isua Krista ke bula naupangte hruai thlengtu, tum hlen chhuak zirtirtu/hruaitu, lallukhum chang tur kan ni thei dawn a ni.

II Korinth 3:6 ah, ‘Engpawh keimahni aṭanga chhuaka ruat turin keimahni ngawtin kan tlin kan ti lo va; kan tlin theihna chu Pathian hnen ata a ni zawk’ tiin tirhkoh Paula meuh pawhin a sawi a, keini phei chuan kan va tlin lo nasa dawn em! Nimahsela, tih tak zetin Pathian ṭih chunga, a mithmuha Kristaah chuan thu kan sawia, kan zirtira, tum hlen chhuak zirtirtu/hruaitu kan nih theihna turin Lalpa’n min ṭanpui ṭheuh rawh se!

- Ammie Lalnunpuii