Raltlante dinhmun

Zo Reunification Orga­nisation (ZORO) hruaitute chuan Myanmar aṭanga sahim­na zawnga Mizorama raltlan mi 5,191 an awm mek thu an sawi a, Myanmar leh Bangla­desh aṭanga raltlante ngaih­sak turin Mizo mipui an ngen.

Kan ṭhenawm ramah politics thil avangin Zo­hnahthlak unaute'n harsatna lian tak an tawk mek a, an rama awm chu him loa hriain an neih thil hlute tlanchhiatsanin Mizoramah an lo lut a ni. Engtia rei nge an awm dawn hriat a ni lo a, a awm hlen tawk pawh an awm hial mai thei a, an awm zel dan tur leh an chungchang hi ngun taka ngaihtuah a ṭul khawp mai.

Kan unaute'n harsatna an tawk a, sahimna an rawn zawng a, engti kawng mahin kan hnar thiang lo a, ṭha taka dawnsawn hi kan tih ngei ngei tur a ni. He mi kawngah hian sorkar pawhin theihtawp a chhuah a, sorkar laipuiin raltlan pangngai anga a dawngsawng hreh chung pawhin anni ṭanpuina tur sum thlengin an dil chhuak thei a, an fakawm khawp mai.

Raltlante hi Mizo mipuiin kan ngaihven loh chuan a sorkar anga buaipui vek sen an ni lo thei a, ṭanpuina vawi hnih khat khawn maia chinfel theih a ni lo. Rilru leh tihtakzeta lo lawm a, an hmalam hun tur thlenga ngaihtuahpui an ṭul takzet a ni.