Krismas chibai bukna

Kum 2022 chhunga Vanglaini chanchinbu chhuah hun ni hnuhnung ber chu kan lo thleng leh ta a; Vanglaini website www.vanglaini.org lamah leh Playstore lama Vanglaini apps lamah erawh chuan tuk tin chanchin thar chhiar tur a awm zel thung ang.

Kum hnih chhung zet chu hripui avangin Mizoramah dan pangngaiin Krismas lawm a theih loh a, Pathian zarah kumin Krismas chu hripui tel loin kan hmang dâwn ta niin a lang. Kum dang zawng aiin a nghahhlelhawm ta bawk niin a lang.

Hunpuiah hian mitin thlamuang taka kan awm theihna tur leh, tar chak lo zawkte leh damlote pawhin hlim taka an hman theihna turin halpuah leh hal mawi hal lo turin sorkar chuan mitin min ngen a, hei hi ṭha taka zawm ni se a lawmawm hle ang.

He hunpui lo thleng tur hi hlim leh läwm takin hmang ila, chet sual leh intihpalh theih thil lakah fimkhur tlâng ila. Lal thar lo piang hi kan zavaia tán a ni a, he hun hi remna thlentu lo ni rawh se.

Vanglaini chhiartu zawng zawngte Krismas chibai kan buk a che u.