CM rawtna leh Aizawl tui tlan

North Eastern Council Planery Meeting vawi 70-na chu tun hnai khan Guwahati-ah neih a ni a, Chief Minister chuan Mizorama lui humhalh a ṭul thute leh chu mi kawnga sorkar hmalaknate a sawi a. Aizawl khawpui tui tlan ber Tlawng lui tui kâm chak lutuk leh humhalh a ṭul dan te a sawi chhuak.

Zoramthanga chuan, Aizawl khaw­pui tui tlan ber Tlawng lui tui chu kum thum chhungin 52.3%-in a tlem a, chu­tih laiin, mipui tui mamawh zat a pun zel thu a sawi a, "Thil chi hrang hranga hmasawnna turin tui hnianghnar neih a pawimawh a. Mizoram sorkar chuan kan luite humhim a nih theih nan committee a din a, Save Mizoram River Act buaipui mek a ni. Kan tuite humhalhna tura hmalaknaah hian min pui turin DoNER leh NEC ka ngen a ni," a ti.

Tlawng lui hi Aizawl khaw­puiin a rin ber a nihlaia a kum tel maia a kâm zel mai hi buaipui a hun takzet tawh a. Tun ang zela a kal chuan kum 20 velah chuan a kang chat mai ang tih a hlauhawm hial tawh a ni. A hunlaia ṭan lâk loh chuan a pawi thui thei tih hriaa theihtawp chhuah a hun tawh. Tui hna humhalh, lui humhalh leh tihthianghlim, thing leh mau phun belh leh lui chhehvel ram humhalh hi a ṭul hle a ni.

Hetihlai hian tui in tur thiang­hlim ṭhahnem zawk leh hniang­hnar zawk neih hi Aizawl khaw­pui hian a mamawh takzet a, Mizoram mipui zinga ṭhahnem tak awm khawmna khawpui hian tui hnianghnar a hmù lo mai ni loin tui in tur hnianghnar pawh a hmù lo ṭan mêk niin a lang.

Hemi atan hian sorkar hian rua­hmanna lian tham siam se, Smart City Project hnuaiah pawh tun aia chak zawkin ke pen se. Khawpui dang pawhin tui in tlak herh haw theiha an pek chhuah theih tawh avangin Aizawl khawpui tán pawh ṭan lâk a hun takzet a ni.

CM berin kan tui lakna kang chat mêk veiin tui thianghlim neih belh dan rawtna a siam hi thil lawmawm tak a ni a, a tlai hmaa kan chet a ṭul ta hle a ni.