Kang ṭhelh turin sorkar inbuatsaih se
Tun hnaiah Hunthar Vengah kangmei a chhuak a, khawtlang mipui beisei angin kangṭhelh motor a thleng rang lo a; Fire & Emergency Services (FES) lamin kang an ṭhelh dante leh thil thleng dan an sawifiah ve thung.
Nikuma ram a kan vak khan Lunglei khawpuiah ram kang ṭhelh thei khawp kangṭhelh motor a awm lo a, Aizawl aṭanga chah phei a ngai a, kalkawnga a hun hman chhungin kang mei a chhuak nasa hman viau tih kan hre tawh. Aizawlah pawh hmun laili berah Aizawl Bawrhsap pisa a kang a, hetah pawh hian a report-tu lam tlai vang pawh a ni thei a, kangmei chhuah ṭan leh a ṭhelhtu lam thlen hun inkar hi a rei hle.
Thil chiang taka lang chu Aizawl khawpuia kangmei ṭhelhna hmanrua kan neihte hi kan khawpui ṭhan dan leh mipui pun dan en hian a beitham hle tih hi a ni. Khawpuiah pawh kangmei chhuak tam tak chu ṭhelh hman lohin a awm ta fo mai a, hei hian kang ṭhelhna kawngah sorkar ṭhan harh a ṭulzia a tilang awm e.
Thawktu indaih loh te, lirthei duh ang neih loh te, kang ṭhelhna hmanrua indaih loh vang te thlengin harsatna an tawk niin a lang a, state pakhat khawpui ve riang ruanga kang ṭhelhna hmanrua kan neihte hian duhthu a sam lo hle. Aizawl pawnah phei chuan kangṭhelhna hmanrua hi a tlem lehzual a, district khawpuiah hial pawh kangṭhelh motor hi a indaih lo takzet tih hai rual a ni lo.
Mizoram ang thawh chhuah nei lo state tan kang ṭhelhna hmanraw ṭha indaih zan tura neih hi thil harsa a ni maithei, chutih rualin tun anga kang ṭhelhna hmanrua indaih lo lutuka awm hi chu sorkar awm mek leh awm tawhte tan mualphona a tling.
Sorkar hian a duhna lamah chuan sum a nei lo hran lo a, a ngaih pawimawhnaah chuan pawisa a seng hreh lo. Kang ṭhelhna hmanraw ṭha zawk leh tam zawk hi Mizoram sorkar hian ngaihtuah rawh se.