Assam Rifles chhuah hun bawk

Aizawl khawpui laili aṭanga Assam Rifles-te insawn chhuah hun tur chungchang Assembly House-ah sawi chhuah a ni a, Land Revenue Settlement minister chuan hun rei lo te hnuah an insawn chhuah a rin thu a sawi. 

Assam Rifles insawn chhuah hun tur hi sawi rik a tam ta hle mai a, tuna MNF-in sorkarna vawn fung an chelh leh hnu pawh hian sawi a ni ta fo mai. Kan chief minister berin kum 2019-a Lammuala Chapchar Kut lawmnaah Mizoram pum hriat turin kum 2020 Chapchar Kutah chuan Lammual aṭanga Assam Rifles-te an insawn tawh tur thu a sawi a, kum 2021 Chapchar Kutah pawh an la insawn chhuak lo. 

Chief minister tho hian Aizawl Municipal Corporation inthlan dawna vote zawnga an campaign-naah February, 2020 chhunga Assam Rifles-te chu um chhuah an tum thu a sawi leh a, February thla a ral hnuah pawh an la chhuak lo. Tunah Assembly House-ah sawi chhuah a ni leh ta a, tun thleng chuan an la chhuak lo ta zel a ni. 

Assam Rifles-te hi state sorkarin an 'um chhuah' theih a ni lo tih a chiang tawh a, theih ni se Zokhawsanga an hmun tur sum tam tak senga buatsaihah hian an insawn tawh ngei ang. Assam Rifles lam chuan Ministry of Home Affairs (MHA) thu an la hmuh loh thu an sawi a, an insawn hun tur hi tute sorkar chak vang leh chak loh vang lamah a innghat lo; MHA-in insawn tura an inpeih hun a tihah an insawn dawn tih a chiang reng a ni. 

Aizawl khawpui laili aṭanga Assam Rifles insawn chhuah hi MHA-in hun a la tih miau loh chuan kan chief minister meuh thusawi pawhin awmzia a nei hleithei si lo a; Assam Rifles insawn tur chungchang hi chu MHA-in rem a tih hun kan nghak tlang mai niin a lang.