MUHCS atan indàwr ngei rawh se
Health & Family Welfare department chuan, Synod Hospital bungrua/hmanrua (facility) neih ang nei mimal damdawi-inte chu Synod Hospital nena an inremna angin Mizoram Universal Healthcare Scheme (MUHCS) zawm turin inremna an siampui theih reng thu a tarlang.
HFW department thuchhuak ang thoin Health Minister pawhin a sawi ve bawk a; MUHCS zawm tura mimal damdawi-inte nena indàwr chungchangah, páwl an dàwr tawh dawn lo a, damdawi-in mal zel an dàwr dawn thu a sawi.
Mizoram Information Commission thupek angin Mizoram State Health Care Society (MSHCS) chuan tun hnai khan Synod Hospital nena an inremna thuthlung an pe chhuak a; damdawia inenkawlna rate zawng zawng pawh tarlan a ni.
MSHCS-in Synod Hospital nena an inremna an puanzar hnuah Aizawla mimal damdawi-inte chuan Synod Hospital rate angin MUHCS an zawm theih thu an tarlang. Chumi chhanna ni àwm takin HFW department pawhin Synod Hospital hmanrua leh bungrua neih ang neite chu Synod Hospital rate anga inremna ziak turin an inpeih reng thu an tarlang bawk.
Mizorama mimal damdawi-inte'n MUHCS zawm an inhuam thu leh, sorkar lamin inremna siam turin an inpeih reng thu an puangzar hi a lawmawm. Mipui tana ṭha tur a ni. Inremna an nei thei tak tak ang em tih hi a pawimawh lai a ni a; inrem ngei se tih hi mipui náwlpui duhthusam a ni ngei ang.
Private hospital-te'n MUHCS an zawm dan turah Health Minister-in páwl an dawr dawn tawh lo a, damdawi-in mal mala an dàwr dawn thu a sawi hi tih dan tur dik tak niin a lang. A chhan chu, mimal damdawi-inte hi an dinhmun a inang lo em em a, hmanrua leh bungrua an neih dan, an changtlun dan leh service an pek a inang lo tlat a ni.
Hetihlai hian, damdawi-in zawng zawngin hmanrua leh bungrua an neih tlanglàwn, an neih vek eng emaw zat a awmin a rinawm a; chungahte chuan rate inang tlang hmantir pawh a ṭul thei ang.
Engpawhnise, a khawi lam ve ve pawh thuchhuah ringawtah tawp loin, private hospital ṭhate'n MUHCS an zawm theih nan sorkar hotute leh mimal damdawi-inte hi indawr ngei rawh se; hei hi mipui tana ṭul leh pawimawh tak a ni si a.