Roll-ah theihtawp chhuah leh a ngai

Mizoram Chief Electoral Officer chuan October 1, 2026 khan thuthar thehdarhtute a kâwm a, Election Commission of India thu angin tun October thla chhungin Electoral Roll Special Drive neih a nih dawn thu a puang.

Aizawl Bawrhsap pisaa official-te pawhin press mite an kâwm a, ECI-in electoral roll-a inthun thar duh te, siamṭhat leh paih ngaite tan BLO-te hnenah dil theih tura a tih thu an sawi.

Tun kum laihâwl velah Mizoramah Special Intensive Revision (SIR) kalpui a ni a, SIR-a mawhphurhna nei official zawng zawngin ram leh hnam hmangaihna thinlung puin theihtawp an chhuah. SIR hi tluang taka neih niin, September 6 khan final electoral roll tlangzarh a ni.

Final electoral roll tlangzarh a nih hnuah sawisel duh tan tan ni 15 chhung zualko theihna hun hawn a ni a, CEO sawi danin, appeal thehlut mi 3,840 an awm. Appeal lutte chu October 6-23, 2026 chhungin ngaihtuah (hearing) a ni dawn. Hei bakah hian ECI chuan electoral roll-a inthun theihna hun October thla chhung zawng a hawng leh ta bawk.

SIR final electoral roll-ah hian draft roll-a chuang mi 30,000 chuang paih an ni a, SIR hmaa electoral roll aṭanga chhût phei chuan mi 50,000 vel an paih an ni. Roll aṭanga paih zinga a tam ber chu Mizoram khawthlang lam, Bangladesh depa mite an ni.

Electoral roll aṭanga paihte chenna hmun thlirin, SIR final electoral roll-ah Mizo mipui an lungawi thawkhat niin a hriat. A chhan ber chu - India khua leh tui dik tak ni lo, ṭhenawm ram aṭanga rawn lut, engtin emawa roll-a thunte paih an nia hriat vang niin a lang.

SIR final electoral roll-a lungawi lohna neia appeal thehluttu mi 3,840 zinga mi 1,679 chu Bangladesh ramri hnaih Lawngtlai district-a mite an ni. Hei vang hian appeal lutte ngaihtuah a nih hunah official-te'n fimkhur taka an endik a ṭul leh ngei dawn.

ECI-in tun October thla chhung zawng electoral roll-a inthun theih hun a rawn hawng leh ta bawk nen, roll buaipuitu, a hniam ber aṭanga a sang ber thlengin an fimkhur taka an chêt a ṭul. Electoral roll-ah India khua leh tui ni lote thun an nih loh nan theihtawp han an chhuah leh se, mipui leh pawlte pawhin theihtawp an chhuah leh a ṭul e.