Inhriatthiam tawn a pawimawh
Tun hnaiah Zokhawthar Branch YMA-in an khaw thlanmuala thlânlunga Mizo ṭawng ni loa hriatrengna thu ziaktute chu chawlhkar khat chhunga siamṭhaa thlak vek turin an hriattir a, siamṭhat a nih loh chuan a ṭul anga hmalak an tum thu an puang. Mizo ṭawng hmang duh lo tan Zokhawthar thlânmualah inphûm a rem loh thu an tarlang bawk.
Zokhawthar YMA hmalakna hi Central Young Lai Association (CYLA) chuan hrethiam loin, an dodal thu an puang ve bawk a; Zokhawthar YMA chu an thu sût turin an ngen.
Mizo ṭawng ni loa thlanlung thuziak Zokhawthar YMA-in an remtih loh thu leh, CYLA thu leh hlate hian sawi zui a hlawh hle a, social media-ah phei chuan ṭawngkam na tak taka sawi an tam hle.
Heng thilte hi hnam kaihhnawih, mi thinlung chhungril tak khawih thei a ni a, mi rilru na taka hliam theihna, hnam anga thinrimna nasa tak thlen thei a nih avangin sawi zui danah fimkhur a ṭul hle.
Zokhawthar YMA hian an khaw thlânmuala thlânlunga hriatrengna thu ziahna ṭawng hman turah hian kum eng emaw zat kal ta aṭang khan dinna mumal tak an nei tawh a, tun hnaiah thuchhuah an neih thar avangin social media-ah a lar ta hluaia sawi a ni. An thuchhuak hi an thlirna aṭang chuan a dik viau thei àwm e. CYLA thuchhuak pawh hi ngaihdan àwm tak, chhan bulbâl tak nei a ni tho bawkin a hriat bawk.
CYLA leh Zokhawthar YMA thuchhuakte hi a bawplawka lak dawn chuan lak theih tak a ni a, chutihrualin, hrethiam duh tan chuan hriatthiampui theih ve ve a ni bawk. Chuvangin, a bawplawk zawnga la loin, dinhmun inhriatthiampui tawn a ṭul.
Mizo hnam chungchang hi a buaithlak em em a, kan hriatthiam chin te, kan pawm dante a inang lo hle. Hei vang hian mi ngaihdan leh pawm dan te, khawi hnam emaw rilru sûkthlêkte hriatthiamsak a ṭul. Ngaihdan dik lo leh ṭha lo, hnam pum tana him lo erawh hnualsuat a ngai.
Zokhawthar YMA leh CYLA thuchhuakte hi hnam inpumkhatna tura ṭhahnem an ngaihna thil ve ve a ni a; an inhriatthiam tawn a ngai a ni ber. Social media-a sawi zuinaah pawh fimkhur tlang ila, ṭawngkam na tak tak hmang lo ila a ṭha e.