Sorkarin Lalsavunga Park ngaihsak rawh se
Hlimen Local Council & All NGO chuan an huam chhunga Lalsavunga Park an khâr mek; Park enkawltu contractor chungchanga an phûtte sorkarin a tihhlawhtlin loh zel chuan October 3, 2026 aṭangin ṭha an tih danin hma an la dawn tih tun hnaiah an puang.
Hlimen khawtlang hruaitute hian Lalsavunga Park enkawltu contractor-in agreement a bawhchhia a, a enkawl ṭha lo hleah an ngai a; a intiam angin sorkarah sum a chhûng lut ṭha lo hle niin an hria a ni. Hei vang hian Park enkawltu contractor rawihna titawp turin August 2026 tìr lam khan sorkar an phût.
Sorkarin contractor a bàn mai loh avangin Hlimen khawtlang chuan September 1, 2026 aṭangin Park chu mipui tlawh theih lohin an khâr. Park khàr a ni tih hre si loa tlawh tuma kal, beidawnga haw leh ta tam tak an awm a, chung zingah chuan hnam dang ṭhahnem tak an tela sawi a ni.
Thil kal vel dan thlirin, Lalsavunga Park hi a neitu sorkar hian a ngaihthah niin a ngaih theih. A chhan chu, khawtlangin thâwm an neih aṭangin thla hnih a tlin hnaih tawh bakah, Park an khàr aṭangin thla khat a liam tawh a; harsatna erawh chinfel a la ni lo.
Park tlawh tuma kal, kal thlâwn mi tam tak an awm tawh hi a zialo tak zet a; a bikin state páwn lam aṭanga rawn kal hnam dangte an kal thlâwn ṭhin hi a zialo lehzual a, an khawngaihthlak bakah, hnam ang pawhin a zahthlak tel.
Hlimen khawtlang thil phût chungchangah hian sorkar lamin hma an la ngeia sawi a ni a; nimahsela, tun thlenga thil awm dan enin, hma an la chak lo deuh a, an ngaihsak tawh lo deuh niin a hriat. Chuvangin, Lalsavunga Park-a harsatna chinfel thuai a nih theih nan sorkar hian chak zawkin hma la rawh se.
Khualzinna leh a kaihhnawihte Mizorama buaipuitu ber Tourism department chuan tun hnaiah 'community tourism' an sawi lâr a, hei hian khawtlang leh vantlang mipui inrawlh tam zawnga khualzinna tihhmasawn a kâwk. Community tourism ṭhatna pawh a lang chho zel.
Hetiang a nih avang hian, khualzinna lam tihmasawn tur hian khawtlang an pawimawh hle tih a lang a, Hlimen khawtlang thil phûtah pawh hian sorkarin chak zawka hma a lak a ngai a ni.