Hindi thiam a pawimawh

September 14, 2026 khan Mizoram hmun ṭhenkhatah Hindi Diwas hman a ni. Hindi Ni puala Greenhill Public School-in Vanapa Hall-a Hindi Concert an buatsaih chu Governor-in a hmanpui a, Dawrpui Multipurpose Hall-ah Chief Minister leh Education Minister ten an hmanpui.

India ramah hian Mizote hi hnam pumpui thlira Hindi thiam lo ber kan ni hial mai thei. Tun hma deuhah Mizo zingah vai huatna a lian a, Mizo mipui tam takin Hindi an hnualsuat niin an sawi ṭhin.

Tunah chuan India-ah kan lut chiang ta a, kan inchhûm hmin sâwt viau. India ram kan dai dar tawh em em a, hmin tin hmun tang kan dâp ve ta. Hindi pawimawhzia kan hre chiang tial tial a, Hindi thiam theihna remchang neih laia thiam tum loh hrim hrim vanga tun hnua inchhîr ta pawh tam tak an awm àwm e.

India ramah kan awm miau si a, India ram kan dai dar nasat tawh bawk si avangin India rama ṭawng tualléng ber Hindi hi Mizote'n hnualsuat loin, kan thiam ve zawk a ṭul hle tawh. Mizoram hi hnam dangin an hre tial tial a, khualzin pawh an pung nasa. Khualzin rawn lut zinga a tam ber chu Hindi hmang an ni a, Mizo náwlpuiin Hindi kan thiam a ṭulna a nasa tial tial a ni.

Hengte avang hian Hindi zirna lam ngaih pawimawha uar a ṭul a, sorkar leh mimal sikulah te hian tun aia uar lehzualin Hindi zirna kalpui theih ni se a duhawm. Hindi ṭawng (spoken) ngawr ngawr zirnate pawh din belh zel ni se a ṭha hle ang.

Hindi Day hmannaah CM chuan Hindi thiam a pawimawh thu a sawi rualin, Hindi hla sak leh tihrîk a nih avanga vai thuama inthuam kher a hriatthiam loh thu a sawi a, "Mizo incheia incheiin Hindi-in a zai theih a, a ṭawng theih... Hindi ṭawng kan thiam hi a tâwk a, kan culture nen Hindi hi i thiam ang u," a ti.

Chief Minister sawi hi ngaihdan awm thei tak a ni a, ngaihtuahna tizautu-ah hmang thei ila a ṭha ang. Chutihrualin, hnam dangte thuama inthuama inchei a ṭul hunte pawh a awm thei tho bawk.