Thisen pek tumte inzêp loh a ngai

Mizoram State AIDS Control Society chuan September 15, 2026 khan Aizawlah thisen pek chungchang zirhona an buatsaih a, thisen pek lam buaipuitute an tel.

Zirhonaah hian MSACS Project Director chuan, Mizoram chu India rama HIV/AIDS hluar berna state a nih avangin thisen pek aṭanga HIV leh natna ṭha lo dang inkai chhâwn a nih loh nan fimkhur a ṭul thu a sawi. HIV leh natna neite chu thisen pek tum lo tur leh, thisen pek duh luat vanga inzêp lo turin a chah.

Mizo nih tinuam em emtu chu tlawmngaihna leh mi dang nunna chhan tura inpekna hi a ni a, chumi atana langsar ber pakhat chu thisen pek a ni. Mizo ṭhalaite'n thisen pek kan uar a, a lawmawm em em; thisen pek nachâng hre miah lo chu an tam tawh lo.

Mi tam tak chuan thisen pe thei lo nih hi an zak a, hrehawm an ti ṭhin a; a âwm em em. Natna hi kan duh vanga nei kan ni lo tlangpui. Natna eng emaw nei, hrisel ṭha tawk lo kan ni thei a, natna kan neih chhan chu eng pawh ni se, kan nihna a nih tlat avangin pawm thiam a ngai.

MSACS Project Director-in hriselna ṭha tâwk lo, natna eng emaw neite chu thisen pek tum lui lo tura a chah hi a pawimawh tak zet. Thisen pek duh luat vanga mahni nihna zêpa thisen pe ta an awm tawha sawi a ni. Chutiang mite chu an tlawmngaihna a lawmawm rualin, mi tana pawi khawihtu, natna thehdarhtu an ni tihna a ni a, a pawi hle.

Mi ṭanpui duhna thinlung hi a ropui a, chutihrualin, thisen pekah kher hi chuan fimkhur a ṭul tak zet. Natna eng emaw nei rêng rêng chuan thisen pek tum lui lo ila, HIV+ve ngat phei chuan tum chhin hauh lo tur a ni. Thisen pe thei lo tih inhre reng chunga inzêp a, pek luih hi hrem theih a ni tih i hre reng ang u.

Natna eng emaw nei kan nih chuan, thisen pek ve duh viau mah ila, thisen pek loh hi mi dang kan ṭanpuina a ni zawk; inthiar fihlim nachâng hriat a ṭul. Thisen pe thei lo ni mah ila, thisen pe tura mi dangte zirtirtu leh fuihtu kan ni thei a ni.