Electric smart meter, bill leh vuivaina
Electric smart meter hman a nih hnuah electric bill nasa takin a sang tih sawi a tam avangin Power & Electricity department chuan September 7-10, 2026 chhung khan Aizawla hmun 21-ah smart meter leh electric bill kaihhnawih harsatna chinfel rûnpui an buatsaih.
Harsatna chinfel rûnpui chhungin complaint 1,340 a lut a, 1,067 (79.62%) chu a hmunah chinfel nghal niin, 271 chu consumer-te ina enfiah tura tih a ni. Complaint lut 1,340 hi smart meter vuah tawh 82,955 aṭangin 1.62% a nih thu an tarlang.
Mipui vuivaina hre tur leh harsatna chingfel tura PE department-in hma an la te, vuivaina lut zinga 79.62% an chingfel nghal te, chinfel theih rih lohte pawh bawhzui tura an dah te hi a lawmawm. Râlkhat aṭanga insawisel leh awmhmuna phun ringawt aiin, hmaichhan ngeia harsatna inenpuiin awmzia a neihzia a lang.
Harsatna chinfel rûnpui chhunga vuivaina lut 1,340 hi smart meter vuah tawh zat aṭanga chhût chuan a tlem angin a lang a; percentage-ah a hniam avangin PE department pawhin data an tihchhuahah an dah langsar viau.
Sorkarin khawl leh bungruate mipui a hmantir tawh a nih chuan a rintlak tur a ni a, dik lo thei lo ang hiala ngaih tur a ni tawh. Chutihlaia smart meter chungchanga complaint thehluh hun ni li chhung leka complaint 1,340 a lut hman hi a tlem lêm lo a, a tam viauah a ngaih theih zawk ve bawk.
Smart meter vuah tawh zinga 98% chuang chuan sawisel an nei lem lo niin a lang a; heti zatin vuivaina an nei lo hian smart meter hi electric bill tisangtu leh hman tlak loh a ni ngawt lo tih a lantir. Khawl a ni a, dik lo erawh a awm thei ngei ang.
Smart meter hman vanga electric bill a san phah nia ngaite vuivaina hi ngaihthah tur a ni lo. Chutihrualin, consumer ṭhenkhat chuan hun kal tawh leh hun hman mek thlir chungin inen chianna tur kan nei ve àwm e.
Electric bill-ah sawisel leh vuivaina a la awm zelin a dawn a, complaint pawh a la lut zel ang. Vuivainate ṭha taka lo dawnsawn hi PE department-a thawkte tih tur, an hnain a ken tel a ni a; ṭanpui duhna rilru púin, hawihhâwm takin lo dawngsawng zel se, consumer-te harsatnate rang taka chinfelsak zel an tum tur a ni.