Mizoram House-te tihchangtlun a ṭul

Mizoram Legislative Assembly-a Subject Committee-II member (MLA)-te chuan September 7-12, 2026 chhung khan Mizoram páwn khawpui hrang hranga Mizoram House-te tlawhin an enfiah.

Mizoram House enfiahnaah hian MLA paruk an tel a, Assembly Secretariat-a official-te'n an ṭawiawm. Mizo mipui tana Mizoram House dinhmun leh enkawl dan te, harsatna an neihte leh hmasawnna a awm theih dan tur te, a pawimawhna leh a ṭangkai dante an zir a ni. An zirchianna report leh rawtna an neihte chu sorkar bawhzui turin Assembly House-ah la pharh leh tur a ni.

MLA rualte'n khawpui hrang hranga Mizoram House-te a hmun ngeiah tlawha an endik hi a lawmawm. An thil hmuh leh zirchianna te uluk taka thlir zuiin, report siam se, Mizoram House-te tihhmasawn a nih a, tun aia a changtlun a, a ṭhat lehzual theihna turin zirchianna hian rah ṭha a chhuah ngei ang.

India ram khawpui hrang hrangah Mizoram House a awm leh, khawpui ṭhenkhatah phei chuan pakhat aia tam a awm hi a lawmawm a, Mizo mipui tan a ṭangkai tak zet. A awmna khawpuia chêng Mizote leh Mizoram aṭanga zinte tan a ṭangkai em em a, mi tam takin an lo chhawr tawh; Mizo tam tak thlamuantu a tling hial àwm e.

Mizoram House-te hi Mizo mipui tan a ṭangkai em avang hian sorkarin tun aia a enkawl uluk lehzual a ṭul. House ṭhenkhat chu a dinhmun enin, building a rinawm tâwk tawh loa rin theihte pawh a awm. Mizoram House building-te hi a rinawm leh rinawm loh dan endik a ṭul niin a hmuh theih a, sorkar hian mithiamte endiktir se a duhawm.

Building ṭhat leh ṭhat loh emaw, a rinawm leh rinawm loh emaw chungchang piah lamah, a mawina leh a chhung lam tihchangtlun chungchangah pawh ṭan lak a ngai. Ṭhenkhat chu a lang chulin a ṭhing deuh rup a, tlabal tak takte pawh a awm a, hnam dang hmuhah pawh a chhuanawm lo viau.

Mizoram House-te hi chei thar a hun tawh hle hlawm a, sorkarin tun aia a ngaihsak lehzual a ngai. Páwn lama hmuh mai theiha chei mawi a ṭul bakah, pindan, bungrua leh hmanraw hrang hrangte pawh changkang zawka thuam a hun tawh a ni.