Raltlante mumal zawka chhinchhiah

August 31, 2026-a Lawngtlai Bawrhsap kaihhruaia Lawngtlaia official-te leh pawl aiawhte ṭhukhawmin an rêl angin, raltlan leh ramdangmi te chu September 2026 aṭangin Lawngtlai khawpuiah in luah phalsak an ni lo. Hei hi ram mipui himna leh dan ṭha taka zawm a nih theihna tura tih a ni.

Ram dang mite chungchanga Lawngtlaia sorkar hotute leh pawl hruaitute rorel hi a ṭha a, an himna tur an vei hle tih a lang. An rorel hi ṭha taka an kenkawh chuan ram leh hnam tan a ṭha hlein a rinawm. Chutihrualin, dinhmun leh chhan eng emaw vangin inhriatthiam a ngaih a ṭul cháng a awm thei ang.

Lawngtlaiah hian veng tinah ram dang mi leh raltlan lut leh chhuak mumal chhinchhiah an rêl a, raltlante zinga inhlawhfa duhte chu an dinhmun thlir chungin khawtlang hruaitute'n hna thawh phalna (work permit) an pek turin an ti bawk.

Sorkar laipui ruahman angin, raltlante hi biometric enrolment hmanga chhinchhiah an ni a, a ṭha. Mahse, biometric enrolment ringawt hi a la tâwk lo thei. Ram dang mi leh raltlante uluk taka chhinchhiah a ṭul a, chhinchhiah ringawt loin, an awm dan en zui a ṭul a ni.

Refugee camp-a awmte hi an awmna VC/LC ṭheuhte emaw, sorkara mawhphurtute'n emaw mumal takin chhinchhiah se. A khát tâwka endikin, record leh mihring awm zat a inmil em tih enfiah ṭhin ni se; inmil lo a awm chuan a chhan hriat nghal zel ni bawk se a ṭha hle ang.

Camp-a awm lo, Aizawl leh hmun danga in luah emaw, chhungte in awm emaw te pawh tun aia mumal zawka chhinchhiah a ṭul a, an chêt vel dan zawng zawng thlithlai reng a ṭul bawk. Ram danga hna thawk turin phalna (work permit) a ngai ṭhin, chutiang chu Mizoramah pawh a taka kalpui a hun ta.

Lawngtlaia an tih ang hian Mizoram hmun dang zawngah pawh tun aia mumal leh ṭha zawkin ram dang mi leh raltlante chhinchhiah a, an chêt vel dante nen hriat chian a ṭul. Myanmar lam aṭanga rawn lutte ngaihtheih lohna a len tial tial avangin thuneitute'n ngun taka ngaihtuahin, uluk taka hma an lak a ṭul e.