Zirlai pawl hnena sum pek/inchhuh

All Mizoram Petroleum Dealers Association chuan, petrol pump-a thawk hnam dang ṭhenkhat chu MZP-in tihluihna hmangin pawisa an chhuh niin September 10, 2026 khan an puang. September 16 , 2026 ral hmaa pawisa pe kîr turin MZP an phût a, an pek kir loh chuan September 17 aṭangin pump zawng zawng khâr an tum.

AMPEDA tarlan danin, filling station pakhata pump manager hnam dang chu MZP-in an pisaah hréngin, tihluihnain September 7, 2026 khan an bank account no. 10763514287 (SBI)-ah Rs 2,00,000 an thuntir a, pump ṭhenkhatah pawisa pe turin an ti bawk.

MZP pawhin pawisa an lak chu an sawifiah a; September 23-25, 2026 chhunga an pawl inkhawmpui atan LT Brothers Filling Station, Keifangin pawisa an thawh a, tihluihna leh kut inthlakna a awm loh thu an tarlang.

Sum inpek/inchhuh chungchanga AMPEDA leh MZP inkara thil awm dan hi a ṭha lo a, chinfel thuai a ṭul. Zirlai pawlte hi tun hma aṭang tawhin Mizorama hnam dang, sumdawng leh hna thawkte hnena sum khawn ṭhina sawi an ni. Zirlai pawlte lam chuan donation an ti mai a; mahse, sum inpek danah tihluihna a tel ṭhina hriat vangin 'extortion' tia sawi a ni ṭhin bawk.

AMPEDA lam chuan MZP chêt dan te, pawisa pek ní te, sum pekna bank account number nen lam an tichhuak a; MZP pawhin sum an dawng tih an pha lo. Sum an inpe ngei tih a hriat a; phal taka inpe nge an nih a, pe lo thei loin an innawr tih erawh hriat chian a har.

Thil thlen dan enin, zirlai pawlte aṭangin petrol pump leh thawktute'n harsatna an tâwk tawh ṭhin a, chungte chu tunah a puak kheh ta niin a lang. AMPEDA-in sum pe kîr tura an phût leh, an pêk kîr loh vanga lungawi lohna lantir an tum dan hi a âwm viau mai thei a; mahse, mipui náwlpuiin an tawrh theih avangin ti tlang loin, chinfel dan kawng zawn ni se a duhawm.

AMPEDA hian filling station-te khâr zawnga hma la loin, dan hnuaiah hma la se, sorkara thuneitute hnenah thlen se a fuh zawk thei. Hetiang boruak a awm tawh chuan sorkar lam pawh a inrawlh a, chinfel dan a ngaihtuahpui a ṭul ang.