SIR 2026-a thawhhona a ropui

Electoral Roll Special Intensive Revision 2026 chu zawh a ni ta a, September 7, 2026-ah electoral roll thar tlangzarh a ni. Roll tharah hian Mizoramah voter 8,35,869 an awm a, mipa 4,03,179, hmeichhia 4,32,689 leh nihna inthlak (transgender) pakhat an ni.

Electoral roll hi a pawimawh em em a, tluang taka SIR 2026 zawh a ni ta hi a lawmawm. Mawhphurhna nei zawng zawngte an thawkrim em em a, ram leh hnam hmangaihna nen theihtawp an chhuah niin a hriat. Political party, tlawmngai pawl, media leh mipui pawhin electoral roll dik tak a awm theih nan an theihna zâwnah ṭheuh nasa takin hma an la bawk. Hengte avang hian roll thar ṭha tak kan nei niin a hriat a, a lawmawm tak zet.

SIR 2026 final electoral roll-a awm zat hi SIR neih hmaa Mizoram electoral roll-a voter zat aiin 39,199 (4.48%)-in a tlem zawk. Hearing neih chhunga thun mi 39,243 tel lo phei chuan SIR hmaa roll hman laia voter zat aiin mi 78,442-in an tlem zawk a, ṭanga voter paih zat hi 8.96% a tling.

Mizoram khawtlang lamah India mi dik tak ni lo, Bangladesh aṭanga rawn lutte electoral roll-ah thun an nia hriatna hun rei tak a awm tawh. Tuna SIR hmanga voter paih tamna bialte hi Lunglei district-a Bangladesh hnaih constituency-te a ni hlawm a; dan loa ram dang mi rawn lut eng emaw zat chu SIR hmang hian roll aṭangin paih an niin a rin theih.

Kum tin electoral roll ennawn (special summary revision) a ni ṭhin a, voter an pung zel tlangpui. SIR 2026-ah erawh chuan roll hman mek aia mi sing téla voter an tlem zawk ta hi dan dik taka thil tih a nih avang leh, dan loa roll-a inthun zinga mi eng emaw zat paih an nih vang niin a lang. Official-te'n ram leh hnam rilru pu chunga rim taka an thawh vang, pawl hrang hrangte'n theihtawp an chhuah vang, thawhhona ṭha tak a awm vang niin a hriat a; an hnathawhte a hlu tak zet.

SIR neih a ni leh mai tawh loin a rinawm a, summary revision erawh kum tin a awm leh ang. Summary revision neih leh hunah pawh ram khua leh tui dik tak ni lote electoral roll-ah thun an nih loh nan theihtawp chhuah tlàn zel a ṭul dawn a ni.