Mizoram-Assam inkungkaihna ṭha siam

Kolasib district leh Cachar district-a sorkar hotute chu bawrhsap ve ve kaihhruaiin September 8, 2026 khan Cachar-ah an inkâwm a; October 30, 2926-a Vairengtea Inter State Border Festival buatsaih tur chungchang leh kawng hrang hranga thawhho dan turte sawiho a ni.

Festival buatsaih tur hi state pahnih mipuite inhriat chian zawkna tur leh inkungkaihna a ṭhat zawkna tura tih a ni a; infiamna chi hrang hrang buatsaih a nih dawn bakah, hnam lâmte entir a ni dawn a, ATMA leh MzSRLM ten an hnuaia thar leh siam chhuahte an pho chhuak dawn bawk.

Mizoram leh Assam hi ramri buai vanga inngur fo kan ni a, kut inthlakna te, silai hmeh puah leh thihna hial a thleng cháng pawh a lo awm tawh ṭhin. Ramri hi la buai reng a ni a, chinfel mai a harsain a rinawm. Chutiang chu ni mah se, inṭhenawm kumkhua tur, inmamawh tawn reng tur kan nih avangin inkungkaihna ṭha neih erawh a ṭul si.

Chhungkua te, unau te, ṭhian hote hi kan inhmuh tam a, thil tihho a tam chuan kan inhre chiang a, kan inngaina a, kan inhmangaih tlang ṭhin a; inhmuh tam loh a, thil tihho tam loh erawh chuan inhriat chian a harsa a, inngainatnate pawh a tlahniam ṭhin. Hetiang hi inṭhenawm khawvênnaah pawh a ni a, state leh state inkarah emaw, a mipuite inṭhian ṭhatna chungchangah pawh a ni zel.

Hnam zia, nunphung leh chìn dan inhriatsak tawnna hian inpawhna a siam a, inngainatna leh induhsak tawnna a thlen ṭhin. Tuna a lan dan chuan, Mizoram leh Assam hi inṭhenawm reng tur, inmamawh tawn reng kan nih avangin, a mi chêngte kan inhriat chian a ṭha a, inhre chiang tur chuan inhmuh tam te, thil tihho tamte a ṭul. Chung atan chuan Inter State Border Festival hi ṭangkai tak a ni ngei ang.

Mizoram leh Assam inkarah Inter State Border Festival a ni emaw, hming dang pawh ni se, hetiang chi hi a tam thei ang ber buatsaih ṭhin ni se, kum khatah vawi khat tal buatsaih ziah theih ni se a duhawm. State pahnih mipui tana thil tihho a tam na nâ nâ chuan state pahnih inkar boruak pawhin a ṭha tial tialin a rinawm.