Fai duhna thinlung put a ṭul

Faina leh thianghlimna lama sikulte an inelna tur 'Mizoram Green Schools League' chu September 1, 2026 khan UDPA Minister-in a tlangzarh. Central YMA-in direct-a a enkawl Aizawla YMA branch hrang hrangte fainaa an intihsiakna kal mekah endiktute'n September 7, 2026 khan endik hna an ṭan. Kum tawp lamah khawpui (notified town)-te fainaa an inelna Mizoram Cleanliness Competition neih a ni dawn bawk.

Mizorama fainaa inelna chi thum kal mek avang hian kan ram, khua/veng leh khawlaite a fai phah ngei turah ngai ila. Naupangte'n faina an ṭhan lenpui a ṭul a, faina an nunpui theih nan an rilru-ah tuh ngheh a pawimawh. Mizoram Green Schools Leagueah hian zirtirtute an pawimawh hle dawn. Zirtirtute'n faina an nunpui hmasa tur a ni a, an zirlaite'n faina an ṭhan lenpui ngei theih nan taima taka zirtirin an kaihruai tur a ni.

Changkang kan tehna hi fainaah a innghat thui hle. Ram, hmun, khua leh veng changkang leh changkang lo kan tehna hmasa ber chu a fai leh fai loh a ni fo; fai pawimawhzia a lang.

Khua leh veng hrang hrangah khawtlang huapin faina hnatlang neih a ni ṭhin. Khawtlang hnatlangah hian thawk chhuak an ṭha ṭhin a, khawlai leh kàwm kár a fai duak ṭhin–a ṭha em em.

Mahse, fai tawh a awm theih loh avangin hnatlang hmanga fai hian rei a daih lo. In chhung vawi khat phiah hian ni tam a daih lo a, khawlai tihfai hnatlang vawi khat hian a daih rei lo hle. Faina hnatlang ko reng theih a ni lo a, bawlhhlawhte hnatlang hmanga thenfai sèn a ni lo. Fai reng tur chuan hnatlang piah lamah mimala chêt reng a ngai.

Faina tluantling hi khawtlang faina hnatlang hmanga thlentir theih a ni lo a; faina tluantling nei tur chuan mi tinin fai duhna tak tak thinlung an put a ngai a, rilru sûkthlêk a dik a ngai a, taimâk a ṭul. Kan fai thei a ni, kan fai tur a ni, tih rilru put tlat a ṭul a; khaw fai, veng fai, khawlai fai nei thei loa inngai chu an fai ngai dawn lo.

Mi tinin fai duhna thinlung kan neih a pawimawh tak zet. Bawlhhlawh leh hnawk neih tlem te, kan bawlhhlawhte khawlaia paih mai loh te, bawlhhlawhte mahni chauh pawha tihfai duhna thinlung te kan neih a ṭul a ni.