PE dept. remchang siam ûm zui ila
Aizawla electric smart meter hman vanga harsatna tâwkte September 5, 2026 khan Power & Electricity Minister-in a inah a kâwm a; smart meter chu India rama state tinte kalpui ngei tura tih an nih thu a lo hrilh nia tarlan a ni.
Tarlan danin, Minister hian, smart meter vuah chu Aggregrate Technical & Commercial Loss tihbona tura ruahman a nih avangin state tinte chu kalpui ngei ngei tura tih an nih thu te, RDSS aṭangin sorkar laipuiin smart meter senso a tum thute a sawi.
Hetihlai hian, Union Power Minister-in April 2, 2026-a Lok Sabha session-a zawhna a chhannaah, smart meter chu in hman luihtir tur a nih loh thu leh, consumer-te duhthlanna a nih thu a sawi tih media hrang hrangah tarlan a ni.
Sorkar laipui leh Mizoram Power minister-te sawi hi a inkalh nia ngaih theih a ni a; media-a tarlan chin piah lamah hian mipui náwlpui hriat si lohin thil eng emaw a awm thei bawk. Electric smart meter hman chungchang hi thil nih dan dik tak, a finfiahna document-te nen mipui hriatthiam turin chiang lehzuala sawifiah a la ṭul niin a lang.
Mizoramah, a bikin Aizawla chhungkaw eng emaw zatah electric smart meter vuah a ni tawh a, chumi hmang chuan kawlphetha hman man pawh mi tam takin an pe tawh. Smart meter hmang tawh zinga tam tamin sawisel an neih loh laiin, mi eng emaw zat chuan meter hlui an hman lai aiin kawlphetha hman man a sân tâk zawk avangin an sawisel a ni.
Kawlphetha hman man sang ta nia insawite harsatna chinfel tumin Power & Electricity department-in hma a la zui a, September 7, 2026 aṭang khan Aizawlah harsatna neite tan a bik taka complaint thehluh leh chinfel rûnpui an kalpui. Mipui harsatna chinfel tuma department-in hma an la leh remchang an siam hi a lawmawm hle.
Harsatna chinfelna tura PE department-in remchâng an siam hi mipuiin remchângah kan la ve tur a ni a; smart meter hman hnua kawlphetha man pek tur nei tam ta sawt nia insawite'n an hmang ṭangkai ngei tur a ni. Department ruahmanna pan tum chuang si loa social media vela sorkar kan sawisel ringawt a nih chuan kan dik bik lo ang.