MUHCS-ah sorkar inhawng zau ve se

Mizorama mimal damdawi-in intêlkhawmna, Non-Government Hospital Association of Mizoram (NGHAM) chuan, Mizoram sorkarin kohhran damdawi-in ṭhenkhat leh mimal damdawi-in dangte a pek ang rate emaw, phaia damdawi-in tam takte a pek ang rate emaw a pek theih chuan MUHCS zawm an hnial loh thu tun hnaiah an puang a; deemed empanelled hospital ang talin sorkarin pawm se an duh thu an sawi bawk.

NGHAM tarlan danin, Mizorama mimal damdawi-in zinga pakuain MUHCS an la zawm lo a, a chhan ber chu, inenkawlna manah an inrem theih loh vang niin a lang.

Sum sénga MUHCS hmangtute'n MUHCS zawmtu damdawi-inte an inchan lo. MUHCS-a inziak lut, MUHCS zawmtu damdawi-ina khum chan loh vanga MUHCS zawm lo damdawi-ina dah luh tâk mi eng emaw zat an awm tawha sawi a ni. Pawisa pea inziak lut, MUHCS hmang thei si lote tan rilru a na duh hlein a rinawm a; sum an sênnaa an chanvo (right) sorkarin a phuhru zo lo tihna a ni.

Heng aṭang hian MUHCS-ah siamrem ngai a la awm tih a lang a, siamrem ngai chinfelna chu mimal damdawi-in tam zawkin MUHCS an zawm theih a ni. Sorkar leh mimal damdawi-inte an inphah hniam tawn a ṭul àwm e.

Hetihrual hian, NGHAM member-te tan damdawi-in dangte leh sorkar inremna rate ang tak beisei vek erawh a remchang lo ang; a chhan chu an dinhmun a inang lo. 'Kohhran damdawi-inte rate ang' leh 'phai lama private hospital-te rate ang' hi Mizorama private hospital zawng zawng hmantir chi a ni lo ang. Damdawi-ina inenkawlna senso (rate) hi chu damdawi-in azir a ni.

Private hospital ṭhenkhat hi chuan kohhran damdawi-in rate aia sang pawh an phú thei a, ṭhenkhat chuan an phû pha kher lo ang. Chuvangin, páwl anga rate inang tlang hman vek ngawt a rem lo ang a, damdawi-in mal tê têa indawr a, inremna siam chi a ni ang.

NHGAM press release en hian, MUHCS zawm turin a hma aiin an inhawng zau hret niin a lang. Sorkar pawhin mipui mamawhna thlir chungin, inhawng zau ve deuhin inphah hniam hret thei se a ṭha hle ang. Private hospital-te leh sorkar hi indàwr thar leh thei se a duhawm a; deemed empanelled hospital anga puan an beisei pawh hi thil àwm tak a nih lai a awm a, sorkar hian ngaihtuahna thar han hmang leh teh se.