Debate kher a ṭûl lem lo

July 27, 2026-a Mizoram Legislative Assembly session-ah MNF MLA pakhatin India leh MNF inremna Memorundum of Settlement leh Inner Line Regulation chungchangah Calling Attention Motion a pu lut.

MoS leh ILR chungchang hi House Leader (Chief Minister) pawhin a sawi zui a, heng thil chungchangah hian debate neih a rawt hial. Opposition Leader pawhin debate neih nan ni khat dang session pawhsei a rawt bawk.

Assembly House-a member-te'n MoS leh ILR chungchanga debate neih an rawtnate hi rorel lai ZPM party chuan ṭul lo an ti a, "Thu dik hre duhtute tan chuan a chiang tâwk em em tawh," an ti.

Inremna leh ILR (ILP) chungchanga ram rorelna sang bera ṭhute'n debate neih an rawt hi mi ṭhenkhat chuan àwm an ti ang a, ngaihthlak pawh an châk viau mai thei. Chutihrualin, mipui tam zawk chuan ṭul lo an tih a rinawm mah zawk.

Tun hnaia Chief Minister-in dan zirlaite hmaah remna thuthlung leh ILP chungchang a sawi a, boruak a alh hluai a, political party-te'n inbeih nan tak an hmang zui. Dan zirlaite hmaa CM thusawi kha mi tam tak chuan a dik thawkhatah an ngai a, chutihrualin, sawi kher ṭul ti lo erawh an tam niin a lang.

ILR/ILP leh MoS chungchanga thil nih dan dik tak hi a ngaihvente chuan an hre thawkhat tawh a; hre chiang tawhte chuan ngaihdan nghet tak an nei tawh. Puitling ni tawh zingah tun thlenga la hre chiang lote chuan, an ngaihven loh leh hriat chian an tum loh vang an nih a rinawm.

MoS leh ILP chungchanga debate-a incho vel hi chu ram leh hnam leh mipui tana ṭhatna leh hlâwkna viau tur a awm lêm lo; politics thila chan ṭhat tumna, mahni ṭanna leh duh dana mipui rilru hneh tumna mai niin a lang.

Chuvangin, ILP leh remna thuthlung chungchanga debate neih hi Mizoram mipui tam ber chuan ṭul lo an tih a rinawm mah zawk a; debate rawttute pawhin tihhlawhtlin tum lo se a ṭha zawk ang. Ram leh mipui tana hlâwkna tur tak tak awm si loa incho kual vel lo hian, ram siamṭhatna leh hmasawnna tak tak tur ngaihtuaha buaipui a ṭul.