Dan hmanga rorelna leh mipui rilru
Champhai NDPS Act Court-in heroin vang man, kum 10 chhung táng tur leh Rs 1,00,000 chawi tura a tih tawh mi pakhat chu Gauhati High Court-in September 1, 2026 khan thiam a chantir a, a chhuah zalên.
Tanhril nula tualthih chungchang police-te'n an chhui chhuah dan an puanzarna press statement chu hnûk kîr turin Gauhati High Court chuan August 31, 2026 khan Mizoram Police a hriattir bawk.
Tanhril nula thih dan hian a hun lai chuan boruak a nei lian a, tualthattu nia police-in an chhui chhuah puanzar a nih hnuah buaina eng eng emaw a thleng nghe nghe. Mizoramah ruihhlo a hluar a, mi tam takin ruihhlo dona lam an ngaihtuah nasat hun lai a ni. Hengte vang hi a ni maithei a, tun hnaia high court-in court hniam zawk thutlukna kalha thutlukna a siam leh police statement a hnuh kîrtir te hian sawi zui a hlawh viauin a lang.
India rama dan hmanga rorelna kalphungah court-in thiam loh a chantirte hian an duh chuan court thutlukna chu court sang zawkah an khing lêt thei a, chutiang chu vawi tam tak a awm tawh. Court sang zawk rorelnaa lungawi lote chu court sang ber thlengin an zualko theih dan a awm.
Court hniam zawk thutlukna court sang zawka khin a nih hian, court thutlukna chu court sang zawkin a thiah cháng a awm a, a nemngheh cháng a awm bawk. Special Judge, Champhaiin heroin vanga man thiam loh a chantir tawh pawh lungawi loin, court sang zawk Gauhati High Court-ah a zualko a, High Court chuan court hniam zawkin thiam loh a chantir tawh chu thiam a chantir a ni.
India rama dan rorelna hi hriatthiam vek a harsa em em. Mipuiin chianga an ngaih hi dan rorelnaah chuan a chiang lo thei a; mipuiin nia an hriat angin dan hmanga roreltu court chuan thutlukna a siam lo ve fo tih hriat a tha.
Court-in dan hmanga ro a relnaah hian finfiahna a pawimawh em em. Court rorelnaah hian pawi khawtu dik tak ni si, chhuah zalen tak an lo awm fo tawh mai thei a, a chhan chu finfiahna tha awm loh vang a ni ang. Thil sual titu ni ngeia kan ngaihte court-in thiam loh chantir loa a chhuah zalen hian, finfiahna tha tâwk a awm loh vang a ni thei tih hriat a pawimawh.