Khauh zawka ui khuahkhirh a ṭul
Serchhip Bawrhsap hoa August 31, 2026-a khawtlang leh páwl hruaitute ṭhukhawm chuan Serchhip khawpuiah khauh zawka ui khuahkhirh rélin, khawlaiah ui chhuak a awm leh awm loh veng hrang hrangah endik an rêl.
Khawlaia ui chhuakte chu man a nih dawn bakah, a neitute lakah District Magistrate-in criminal complaint a siam ṭhin dawn tih tarlan a ni a; ui neitu hrem a nih theih nan hmalak an rêl bawk.
Serchhipa sorkar hotute leh khawtlang hruaitute'n ui khuahkhirh tura hmalakna tur an rêl hi a ṭha a, khauh takin kalpui se a ṭha hle ang. A hlawhtlinna erawh an bawhzui danah leh dan leh thupek an kenkawh ngam danah a innghat dawn.
Mizoramin faina leh thianghlimnaah hma kan sâwn zel a, khawpui leh thingtlang khuate a fai tial tial. District khawpuite leh thingtlang lam hi Aizawl aiin an fai tlangpui zawkin a hriat a, Mizoram hmél lanna ber Aizawla chêngte hi faina leh thianghlimna lamah ṭan lehzual a ngai.
Ran khuahkhirh chungchangah Aizawl leh district khawpuite ṭan lehzual a ngai niin a hriat. Aizawlah hian veng tam takah khawlaiah ui hmuh tur a la awm fo a, ui êk pawh hmuh tur a la awm; a zialo a, a zahthlak bawk.
Ui hi a neitu tan ran ngainatawm tak an nih rualin, mi dang tan erawh an hlauhawm fo a, an hnawksak ṭhin. Chuvang chuan, danin ui hi khuahkhirh tura a tih angin, mi dang tana an hnawksak loh nan leh, khawlaiah an êk mai mai loh nan a neitute'n an khuahkhirh ngei a ṭul.
Serchhipah khauh zawka ui khuahkhirh an tum ang hian district dang khawpuite pawhin hma la ve se. Aizawlah khauh zawka ui khuahkhirh a nih theih nan sorkara district administration hian hma an lak a ṭul. Ui khuahkhirhna leh khawlaia chhuahtir khapna thupek chhuah ringawt loin, a taka bawhzui a ṭul tawh a ni.
Khawtlang hruaitute zingah ui khuahkhirhna khauh taka kengkawh an awm laiin, khauh lêm lo an awm; dan kenkawh duh leh duh loh leh, ngam leh ngam loh azir a ni thei. Khawlaia ui chhuahtir phal lohna hi khawtlang hruaitute'n khauh zawka an lekkawh ngam a ṭul a; ui neitute'n dan leh thupek an zawm a ṭul bawk.