Ruihhlo vaia state pâwna kal tihtawp a ṭul

Working Committee on Ruihhlo Do chu August 28, 2026 khan Secretariat conference hall-ah an ṭhukhawm a; Mizoramah ruihhlo a tlem sâwt thu leh a man a pun nasat thu te, chumi avang chuan Assam lamah ruihhlo zawnga kal an tam phah thute sawi a ni.

Mizoram sorkar, kohhrante leh tlawmngai pawl, a bikin YMA-te'n nasa takin ruihhlo an do a, ruihhlo man pawh a tam. Heng hmalakna hrang hrang rah chhuah nia ngaih theihin ruihhlo a tlem tial tiala sawi a ni hi a lawmawm hle.

Mizoramah ruihhlo a tlem tial tiala sawi hi a dikna lai a awm ang a, a dik loh theih dan pawh a awm tho mai thei. A chhan chu, chanchin tharah ruihhlo, a bikin heroin leh methamphetamine man a nih thu tarlan a ni reng a, ni tin man a awm emaw ni chu tih mai tur leh a hma zawng aiin an man zing ta emaw tih mai tur a ni. Hemi aṭanga ngaihtuah chuan ruihhlo a tlem tial tial lo nia ngaih theihte pawh a ni ang.

Chutihrualin, ruihhlo man zinga a tam zawk chu state páwn lama kal zel tur niin a lang a; Mizoram chhung bika lêng vel chu a tlem tial tial niin a lang a ni.

Ruihhlo a tlem tial tial nia sawi a nih laia Assam lama ruihhlo zawnga kalte an tam leh ta hi a zialo hle. Excise & Narcotics leh Police mi leh sate'n an vil reng thu tarlan a ni a, hei hi a ṭha hle.

State dangah ruihhlo zawnga Mizo ṭhalaite an kal hi Mizoram tan a mualphothlak a, titawp tura ṭan lak a ngai. A theih chin chinah tihtawp theih a duhawm a, titawp turin Excise & Narcotics leh Police ten theihtawp chhuah zel se, a ṭul angin tlawmngai pawlte pawhin pui thei se a ṭha hle ang.

Excise Minister-in a sawi angin, Mizoramah ruihhlo a tlem tial tiala hriat ni mah se, a la hluar reng tho a; chuvangin, sorkar, pawl, kohhran leh mi tinte'n theihtawp chhuaha ruihhlo kan do tlan zel a ngai a, ruihhlo ti thar tur vên kawngah nasa taka ṭan lak zel a ngai a ni.