School upgrade hmanga politics khelh

MNF party chuan Mizoramah sorkarna an chang leh a nih chuan, an sorkar veleh MNF sorkar hmasaka sikul tam tak dinhmun sang zawka an lo dah tawhte chu an hlankai tawhnaah an dah leh nghal dawn thu August 18, 2026 khan resolution siamin an puang. An sorkar laia sikul tam tak an upgrade tawh ZPM kaihhruai sorkarin a sût leh chu ṭha lo an tih thu an tarlang bawk.

Khawtlangin mamawhna vanga an din sikulte dinhmun sang zawka dah chhoh hret hret hi tun hma aṭanga tih dan a ni a, chuiang chuan tuna Mizoram sorkar sikul zinga tam tak chu kal chhohpui an ni. Mizoramah party hrang hrang kaihruai sorkar a ding tawh a, chungte chuan sikul eng emaw zat dinhmun sang zawkah an hlang kai tawh ṭhin.

Eng emaw cháng chuan dinhmun sang zawka sikul dah chhoh chhan hi inthlan thlîr ràn chunga inthlana chak beiseina vanga tih ang viau ṭhin; a chhan chu hun kal tawhah school upgrade hi inthlan hma lawka tih a nih ṭhin vang a ni. School upgrade a ṭul tak zet a nih chuan, inthlan dawnah kher lo pawh upgrade tur a ni ang.

Mamawhna vanga khawtlangin sikul an dinte dinhmun sang zawka hlan kai te, sorkar sikula dah te hi a àwm em em. Sikul, zirtirtu leh zirlai dinhmunte zir chiang lêm lo leh sorkar dinhmun ngaihtuah lêm loa a páwng a taka dinhmun sang zawka dah burh burh erawh a ṭha lêm lo thei.

School upgrade hi sorkarin sum leh pai leh thil dang danga a tlin tâwk ngaihtuah tel ngei tur a ni a, dan ang takin, paltlang hmasak ngai angte paltlang vek a ṭha. Sorkar tan phurrit leh harsatna thlentu a nih theih dan te, mamawh dante ngaihtuah tel a ṭul.

Sikulte dinhmun sang zawka hlan kai te, provincialise te hi politics khelh nan hmang tawh lo ila a duhawm. Politics khelhna atan leh sikulin a kaihhnawih mihringte hîp tumna vanga tih a nih chuan zirna ṭha duh vang a ni tawh lo ṭhin. Inthlan dawn vang ni lo, chhan dang ṭha tak neiin, sikul, zirlaite leh zirnain hma an sawnna tur ngaihtuahna vanga tih ni tawh rawh se.