Sikul dan ennawnah fimkhur ni se

August 18, 2026-a Council of Minister ṭhukhawm chuan Mizorama khawtlang din sikul tam zawk provincialise a nih theih nan dan (rules) hman lai ennawn a remti.

Council of Ministers hian khawtlang din sikulte sorkar sikula dah (provincialise) a nih theih nan dan hman mek ennawn a, sikulte tan kawng tihawlsam an rêlah hian, sum leh pai sên ngai tur zat zir chian ni se, an ti a; ṭhutkhawm leh hunah ngaihtuah leh turin an dah.

Mizoram Govt. Adhoc Aided High School Teachers’ Association chuan Council of Ministers-in an sikulte provincialise an remtih theih nan August 18 chawhma dar 10-ah mahni sikul ṭheuhah ṭawngṭai turin ngenna an tichhuak a; anni hi tun hnaia hun eng emaw chen nuar a, sikulte pawh lo khâr tawh an ni.

Lungawi lohnate hi ngaihthah lo leh enliam mai loin, ngaihven a ṭha a, lungawi loh chhante zir chian a ṭha. Mahse, lungawi lohna leh nawrhna vang ringawta an phût ang tihhlawhtlin zel erawh a ṭha lêm lo. Provincialise phûta nawrh chiam hi zirna ṭhat zawkna tur aiin, sorkar hnathawk hamṭhatte neih ve duhna vanga ngai tam tak a awm vein a rinawm.

Adhoc H/S leh M/S ni ṭhinte thil phût hi ngaihven a, uluk taka zir chian leh a ngai. Heng sikulte awmna (status) tura sorkarin a tih hi tun hma lam daih thil a ni lo a, tun hnai lawk thil a ni; chuvangin, an dinhmun leh an phûtte hi sorkarin a ennawn a, dan siamṭhat a tum a nih pawhin a fimkhur hle tur a ni.

Thil hrang hrangah tehfung a ngai ṭhin a, tehfung awm loa a pâwng a taka thil tih a ṭha lo. Khawtlang din sikulte chungchangah pawh, sorkarin tehfung a siama tlingte chu sorkar sikulah a dah a, tehfunga tling lote chu a dah lo mai a; tehnaa tling chiah lo, an dinhmun ena ngaihhnathiam bik erawh a awm àwm e.

Tun hnaia nuar sikul zingah tehfunga tling chiah lo, ngaihhnathiam theih leh rules siam rem hreta provincialise àwm takte an awmin a rinawm; chutihrualin, lungawi lo sikul zawng zawng provincialise vek chi erawh a ni kher lo ang - sorkar hi fimkhur hle rawh se.

Khawtlang din sikulte sorkara dah leh dah loh chungchangah hian fimkhur hle a ngai a; zirtirtute hamṭhatna tur ngawr ngawr aiin, zirna ṭhat zawkna tur leh naupangin hma an sawnna tur a pawimawh zawk tih hi hre reng se a ṭha ang.