Thu mai ni lo, a tak ngeiin ni se

Land Revenue & Settlement Minister chuan August 17, 2026 zinga Bungkawna an party vantlang inkhawmah, LRS department-in ram an tehnaah a hmasa apiang teh hmasak a nih thu leh, thil ti thei zawkte'n an hmaa mite an hmakhalh an remtih loh thu a sawi.

Revenue Minister hian May 26, 2026 khan press conference neiin, LRS department hmalakna hrang hrang a sawi a, ram tehnaah 'first come, first serve' anga an kal thu a lo sawi tawh bawk. Hetianga Minister-in a sawi hi a lawmawm em em a, a taka kalpui ngei a ṭul.

Tun hma aṭangin LRS department hi department hnawk ber zinga ngaih a ni a, ram teh tur pawhin thawktute tham an ngai ṭhina sawi a ni. A kuma kum ram teh tura department nghak pawh an awma sawi a ni ṭhin.

Hei vang hian mi tam takin harsatna an tâwk nasa a, thuneitu, thil ti thei deuh pûr tur nei ve lote an bet rawk rawk mai a, an khawngaihthlak hle. LRS department hi Mizoram sorkar department zingah siamṭhat ngai ber zinga mi a nia sawi a ni hial nghe nghe.

Sorkar leh a changtu Minister ten LRS department siamṭhat tumin nasa takin hma an la a, an ṭang hle niin a hriat a, a lawmawm tak zet. Chutihrualin, duh ang taka siamṭhat duak duak emaw, kalphung thlâk nghal zung zung erawh a harsa ang tih a rinawm. Sorkar leh Minister te hian theihtawp chhuah zui zel se, LRS department hi mipui tana dawr nuam leh awlsam a nih theih nan siamṭha turin beidawng loin ṭang zel rawh se.

'First come, first serve' tih thu hi a mawi a, ram tehnaah kalpui a nih thu Minister-in a sawi hi a lawmawm. Sawi ringawt ni loin, mipuiin a taka an tawn a ṭul. 'First come, first serve' tih hi mipuiin a taka an tawna an sawi ve theih nan a tak taka kalpui ngei a ngai a ni.

LRS surveyor-te ringawtin ram teh dilna an tihhlawhtlin sên loh avangin empanelled surveyor hman a ni a, sum sênga rawih an ni. Empanelled surveyor-te hi department leh mipuiin an sâwtpui ngei tur a ni a; sum sên belh a ṭul theih rualin, mipui tana hautak lo thei ang bera tih ni thei se a duhawm.