Rin thu sawi a ṭangkai lo

August 3, 2026 zan aṭanga bo Mualṭhuam North tleirawl pakhat chu August 5-ah thia hmuh a ni a, Mizoram a dêng chhuak hneh hle.

Hmeichhe tleirawl thihna hian a hria apiangte thin a ṭháwng a, Mizoram mipuiin kan lainat rawn a ni. Mizoramah tualthihna a thleng leh ṭhin hi a pawi tak zet a, tleirawl chhungte leh laináte an lainatawm em em a, an awmna khawtlang mipui an khawngaithlak bawk.

Chief Minister leh ram hruaitu ṭhenkhat te, pawl hrang hrangte'n tawrhpuina leh sûnna thu te, thil thleng demna leh pawikhawihtu chhui chhuah ngei an duh thu te an tichhuak. Hetianga tawrhpuina ram hruaitute leh pawlte'n an tichhuak hi a hlu a, chhiat tâwk chhungkua leh khawtlang tan a thlamuanthlak hle ang.

Tleirawl hi mi kut tuara thi a nia hriat a ni a, police-te'n uluk takin an chhuiin a rinawm a, theihtawp chhuah se. Police-te hmalakna tiṭhuanawp zawng ni loin, ṭanpui zawng leh an hna tichak thei zawngin khawtlang leh pawl hrang hrangte'n theihtawp an chhuahpui a ṭul dawn.

Social media chak tak avangin Mizorama thil thlengte a darh chak em em a, Mualṭhuam North-a thil thleng pawh a darh chak hle. Mibo thia hmuh a nih hnu lawkah social media-ah nasa takin a darh a; a darh rual rualin mi tam takin rin thu an lo sawi ve nghal bawk.

Rin thu sawi hi a ṭangkai lem lo a, a ṭangkai loh mai piah lamah, mi rilru natna thlentu a ni fo zawk. Tleirawl thihna chungchangah pawh, zana chhuak a nih avanga a chhungte tana hriat nuam lo zawnga sawi te, pawikhawihtua raltlan puh nghal ngawtte tam tak an awm.

Social media-ah rin thu sawi mai mai loh a ṭhat lohzia a lang chhuak thar leh a, mi tin kan fimkhura kan insûm a ngai a, thil ṭul hauh lo sawi lo tura kan insûma kan invên tlàn a ṭul.

Sualna rêng rêng mi tinin enliam mai lo a, kan theih chinah ṭheuh kan do a ṭul. Chhunah a ni emaw, zanah a ni emaw, Mizorama khaw tin leh veng tin hi nunau tana hmun him a nih a ngai; khawtlang him leh ralmuang siam tura hmalak hi mi tin mawh a ni.