Ration card leh buhfai sem kalphung

Food, Civil Supplies and Consumer Affairs Minister-in August 3, 2026-a a sawi danin, April 2024 aṭangin retailer-te'n thla tina buhfai an sem bâng, thla leh atana sem tura dahṭhat (carry over) mumala kalpui a ni. Carry over vangin April 2024–March 2026, thla 21 chhungin buhfai qtl 1,05,973.19 hum a ni a, cheng vbc 38 man a ni.

Mizorama ration card-ah mi 11,50,407 an awm mek a, chung zinga mi 7,08,191 (62.3%) chu National Food Security Act hmangtute niin, mi 4,42,216 (37.7%) chu NFSA hnuaia awm lote an ni.

Tun hma deuh khan Mizoramah mihring awm zat aia tam fé ration card-ah an awm a, ration card pakhat aia tama hming lang mi tam tak an awm vang a ni ber. Ration card pakhat aia tama awm hi thil dik lo ni mah se, mi tam takin thil dik loah an ngai lem lo niin a hriat a; hei hian thil dik lo kan ngaihzamzia a lantir.

Tunah chuan ration card-a hming chuangte chu Aadhaar card nen thlun zawm a nih tawh avangin ration card pakhat aia tamah awm theih a ni tawh lo a; ration card-a hming chuang zat pawh a nuai télin a tlahniam tawh. Thil dik lo vêng tur hian kalphung dik a ngai hle tih tichiangtu a ni.

Ration card pakhat aia tama mi tam tak an awm avang khan sorkarin ṭul hauh loah cheng vaibelchhe tél a sèn phah. Retailer-te'n buhfai sem zawh sên loh an nei a, chungte chu hmun dangah an hralh leh a, sorkarin ṭul loah sum tam tak a sên phah bawk.

Ration buhfaia ṭul lo leh a chuangliama sorkar sum sên titlem tura sorkarin retailer-te'n buhfai an sem bâng, a thla leha sem tura a ti hi a ṭha tak zet. Carry over kalphung avang hian tun hmaa sorkarin ṭul loa sum tam tak a lo sên ṭhin kha tihtawp a ni ta a, kalphung ṭha tak a ni.

Hetihrual hian, buhfai sem kalphungah dik tâwk lo, felfai tâwk lo a awm thu sawi hriat tur a la awm zel tho. Felfai lehzuala buhfai sem a nih theih nan leh dik lehzuala dan kengkawh turin sorkarin hma la zel se, huaisen takin kal zel rawh se.