Damdawi zuarte ngawrh zawka vil

Food & Drugs Administration hotute'n kumin June thlaa an sawi danin, kum liam ta 2025-26 chhungin dan bawhchhiaa ruihna atana hman theih damdawi zawrh/hralh kaihhnawihah drug license 10 tihtawp a ni a, license pariat tihtawp lailâwk (suspend) a ni. Kumin 2026-ah January-June chhungin drug license pahnih tihtawp a ni tawh a, pali suspend a ni tawh bawk.

Mizoramah drug license nei mi 4,102 an awm mek a, chu'ng zinga 2,212 (54.07%) chu Aizawl district-a mi an ni. May-June 2026 chhungin drug licence 94 endik aṭangin pharmacist nei lo license pasarih suspend a ni.

Report aṭang hian Food & Drugs Adminis-tration (FDA) hian mipui náwlpui hriat lêm lohin hna an thawk a, hma an la reng tih a hriat. Thawktu an indaih lo hlea sawi a ni a, chuti chunga a theih ang anga damdawi zuarte an endik ṭhin hi a lawmawm.

Damdawi zuar zingah mi fel leh ṭha tam tak an awm laiin, hlâwk tum luat vanga dan bawhchhiat hreh lo, dan loa thil ti ṭhin an awm thei. Chutiang mi an awm leh awm loh eng lai pawha ngaihven a ṭul a, a khát tâwkin uluk taka endik reng a ṭul.

Tun hmain damdawi zuar ṭhenkhatin Myanmar lamah dan loin damdawi an thawn lut nasaa sawi a ni ṭhin. Dan loa ram danga damdawi thawn chhuak ṭhin hi tunah pawh an la awm reng mai thei a; thuneitute'n uluk takin damdawi zuarte an thlithlaia an vil reng a ngai a ni.

FDA hian ṭhahnemngai takin damdawi zuarte hi uluk zawk leh zing zawkin endik zel thei se, damdawi zuarte'n dan dik taka damdawi an zawrh theih nan ngawrh lehzuala vilin enfiah se, theihtawp han chhuah zel teh se.

Mizoramah damdawi dawr tam tak a awm a, tuna FDA dinhmun ngaihtuahin, damdawi dawr zawng zawng vil hneh a harsa hlein a rinawm. Kim zawk leh zing zawka damdawi dawrte vila an endik theihna tur chuan sorkarin FDA a tihchak lehzual a ṭul.

Damdawi zuarte pawhin an mawhphurhna an hriat chian a ngai a, dan an zawm a pawimawh a, rilru dik an put a ngai. An fimkhur loh vang leh dan an zawm duh loh avangin mi nun an tichhe thei tih inhre chiang hle rawh se.