Two wheeler-a helmet khum
Aizawl Traffic Police-te'n kumin 2026-ah Aizawlah Special Drive vawi nga an nei tawh a, dan bawhchhia 870 an man zingah two wheeler khalhtu helmet khum lo 279 an tel. January-June 2026 chhunga lirthei dan bawhchhia man zingah helmet khum loa two wheeler khalh an tam hle bawk.
Traffic police-te'n tun hnaiah helmet khum a pawimawhzia sawina video tâwi social media-ah an tichhuak ṭhin. Danin helmet khum tur a tih vang a nih piah lamah, chetsual palha himna an duh vang niin a lang.
Mizoramah two wheeler hnunga chuang (pillion rider)-te chu helmet khum tura phût an ni lo. Traffic police-te'n helmet khum a pawimawhzia an sawiin, a khalhtu chauh an sawi a, a hnunga chuang an sawi tel ngai lo.
MV Act Section 129-ah chuan, two wheeler-a chuangte'n helmet ṭha khum ngei tura tih a ni a; hei hian a khalhtu chauh ni loin, a hnunga chuang pawh a huam. Turban khum ṭhin Sikh-te chu ngaihhnathiam an ni.
Two wheeler khalhtute helmet khum ngei tura tih a ni hi a ṭha a, dan zawmna leh himna atana pawimawh a ni. Helmet khum hi a khalhtu tan a pawimawh ang thoin a hnunga chuang tan pawh a pawimawh a, danin a phût a ni bawk. Chutihlaia Mizoramah two wheeler khalhtu chauhin helmet khum tura khauh taka tih a ni hian ngaihtuah a tithui viau.
Mizoramah two wheeler chesual tam tak a awm tawh a; two wheeler chetsualnaa thi zingah a hnunga chuang thi ta pawh eng emaw zat an awm tawh.
Kumin May thla khan Aizawl Chanmari-a two wheeler chetsualnaah a khalhtu thi loin, a hnunga chuang a thi a; tun hnai July-ah pawh Khawzawlah a khalhtu thi loin, a hnunga chuang zawk a thi. Helmet hi two wheeler-a chuangte himna atan a pawimawh a nih tak zet chuan, a khalhtu chauh ni loin, a hnunga chuangte pawhin an khum a ṭulzia a lang.
Two wheeler khalhtuin helmet khum a ṭul chhanah - danin a phût vanga nih thu leh himna sawi a nih laiin, pillion rider-te khum tura tih an ni ve si lo hi sorkarin dan a namnûlna a ni thei a, a duh chinah dan a rêk bung tihna a ni. Two wheeler hnunga chuangte himna ngaihthahnaah a ngaih theih bawk. Helmet khum chungchang hi thuneitute'n uluk taka an ngaihtuah zui a ṭul.