SIR hearing vil uluk lehzual ni se

Special Intensive Revision (SIR) Draft Roll-ah dilna leh sawiselna te ngaihtuah mek a ni a, hmun hrang hrangah endikna, hearing a kal mek. Tluang taka hearing a kal laiin, Lawngtlai district-a ERO pakhat chu a ruih lutuk avangin hearing-ah hna a thawk thei lo a, koh haw a ni.

CYMA hruaitute chuan a hmain Mizoram chhim lama SIR 2026 official pawimawh tak zingah zu vanga buai, hna thawk ṭha thei lo an awm thu an lo sawi chhuak tawh. Hun a kal a, ruih vanga harsatna awm ṭhin chu a puak ta nge nge a ni. CYMA hruaitute sawiah hian thuneitu sang lamin hma an la har deuh a, a puah chhuah hnuah hma an la chauh niin a lang.

ERO koh haw tâkin khaw hrang hranga SIR hearing a lo tih tawh zawng zawng chu tih ṭhat leh vek tura tih a ni ta hial a; thuneitu sang zawkte'n thawktu rinawm lo, rintlak lo an enliam rei mah mah hi a pawi hle.

SIR hearing hi August 4, 2026 thleng tur a ni a, ni 3 emaw bak a awm tawh lo. SIR a khawmuan phah emaw, mumal leh uluk taka hearing an zawh hman loh phah emaw a nih chuan a pawi hle dawn; electoral roll dik tâwk lo neih phah theihna a ni ngei ang.

Mizoram chhimthlang lamah Mizoram mi dik tak ni lo, Bangladesh aṭanga rawn lut an tam a, tun hma aṭangin Electoral Roll-a an inthun danah dik lo a tama rin leh sawi reng a ni. Official-te an theih ang anga tihbuai a, Roll aṭanga paih an nih loh nan leh, khua leh tui dik tak ni lote thun an nih theih nana hma la duh an awm thei a; SIR official-te an fimkhur lehzual a ṭul.

SIR hearing hi hotu sangte'n chîk lehzuala an vil a ngai a, a hmunahte pawh an kal chilh a ṭul tih a lang. Official tu emaw ruih vanga hearing tih tawh zawng zawng tih ṭhat leh vek a ngai hi a 'serious' tak zet a, Election hotu sang ber ber te, Roll Observer te pawhin a hmuna kal chilha an enfiah a àwm hle.

SIR neih meka YMA ṭhahnemngaihna leh hmalakna a lawmawm tak zet a, CYMA leh YMA branch-te ṭang sauh sauh zel se. YLA an pawimawh a, an ṭan lehzual a ṭul a; YCA pawhin an chênna Mizoram tan rilru dik pu chunga SIR an hmachhawn a ṭul bawk.