Pisa kai hun leh endik thut

Lunglei Bawrhsap chuan July 21, 2026 khan sorkar pisa ṭan hun, zing dar 9-ah sawi lâwk loin Bawrhsap pisaa pindan hrang hrang a tlawh a, thawktute hun vawn dik dan leh pisa inkaihhruaina zawm dan a endik.

Bawrhsap hian July 21 vêk khan thupek a chhuah nghal a; pisa ṭan hun zing dar 9-ah pisa thleng vek tur leh bàn hun tlai dar 5 thleng pisaa awm turin a hriattir. Pisa kai hun chhungin duty ṭul ni loah pisa chhuahsan loh tur a nih thu leh, loh theih loha chhuah a ngai a nih pawhin phalna lak hmasak tur a nih thu a tarlang.

Lunglei DC-in sawi lâwk loa pisa pindan hrang hrang a tlawhah hian, pisa ṭan hun, zing dar 9-a thleng hman lo an awm leh awm loh tarlan a ni lo; mahse, thupek a chhuah nghal avangin pisa ṭan huna thleng lo an awm nual niin a rin theih.

Mizoram sorkarin kum hnih chuang hret kal ta khan hun vawng dik turin sorkar hnathawkte a hriattir a; hei hi sorkarin a kengkawh ṭha thawkhatin a hriat. Sorkar hnathawkte'n tun thlengin an zâwm vek lo tih erawh a lang. Ṭan huna thleng thei lo, chhuanlam ṭha tak nei reng theite an awma sawi a ni a; pisa ṭhenkhatah chuan an inthlahdah leh viau tawha sawi pawh a awm.

Lunglei Bawrhsapin a enkawl pisaa thawkte sawi lâwk loa a endik thut hi a ṭha hle; endikah duhtâwk mai lo a, pisa kai hun chhung ṭha taka zâwm tura thupek khauh tak a chhuah zui nghal hi a ṭha lehzual.

Sorkar department leh pisa danga hotute pawhin Lunglei DC hmalak dan hi entawn hreh loin ti ve se a ṭha hlein a rinawm. Hotu zawng zawngin an enkawl pisa ṭheuhte pisa kai hun dik taka an zawmpui a ṭul. Hun vawng dik lo fote chu hrem hreh lo se, pisa kai hun dik taka zawm hi sorkar thu ding lai a nih avangin ṭha taka kengkawh ṭheuh a ṭul.

Pisaa thawktute inthlahdah leh inthlahdah loh te, taimak leh thatchhiat te hi hotu lúte mawh a ni pakhat a; inthununna ṭhaah chuan a zawmthâwt theih loh a, a inthlahdah theih loh tih hi hriat reng a ṭha e.