Lammuala chhehvelah hmalak chak a ṭul

Mizoram sorkar chuan Aizawl khawpui lailia Assam Rifles awmna ṭhin hmun cheibâwl tumin hma a la a; chumi chhunga UDPA department-in Vanapa Hall & Park sak dan tura Architectural Design Competition a buatsaih chu July 20, 2026 khan result puan niin, a hmáwr bàwk a ni.

Result puannaah hian Chief Minister chuan, Vanapa Hall & Park Aizawla chu puipunna hmun langsar ber tur a nih avangin mawi, ṭha leh him ni se an duh thu a sawi. UDPA Minister pawhin, Aizawl hmél thar changkang, mipuiin an hman ṭangkai tur sorkarin a duan chu a taka chantir thuai an tum thu a sawi.

AR awmna ṭhin hi khawpui laili a ni a, Aizawl 'hmél' pakhat a ni. CM-in a sawi angin, Aizawl timawitu tur, khawpui hmel lanna tur a nih avangin ruahman ang taka a puitlin hi mipui beisei a ni. Mipui ngaihven bik a nih avangin hna ṭha tak, chak tak sia thawh a ṭul a, chutiang tur chuan thuneitute tun aṭanga an inbuatsaiha hma an lak a ngai.

Aizawlah hian khawlaia punkhawmna hmun bik a awm lo a, Vanapa Hall kawt hman a ni tlangpui; kawngpui sir mai a nih avangin kawngpui hnawh a ni fo a, traffic jam a nasat phah a, harsatna a thlen ṭhin. Tuna Vanapa Hall kawta punkhawm vanga harsatna thleng ṭhin hi AR chhuahsan hmun hmang hian chinfel emaw, tihziaawm emaw tum ni se a ṭha hle ang.

Mihring ngaih pawimawh leh duh zawng a inang lo a, AR chhuahsan tâk hmun hman dan turah pawh mipui duh dan a thuhmun vek ngai dawn lo. Mi ṭhenkhatin an duh leh ṭha an tih kha mi dangin an pawmpui kher lo thei a, duh dan leh ṭha tih dang daih an nei thei.

AR hmun hman zui dan turah hian kan duh leh ṭha kan tih angin sorkarin hma a la lo a nih pawhin, kan hriatthiam ve tur a ni ang. Mi chi hrang hrangin vawi tam tak an sawiho a, chumi hnua thutlukna siama hmalak a nih avangin pawm mai a ngai.

Tunah chuan sorkarin AR hmun hluia ruahmanna a neihte a taka tipuitling turin chak taka hmalak a pawimawh tawh a; sorkar leh a thawhpuite'n theihtawp chhuahin hma la rawh se.