Zirlaite nasa lehzuala an ṭan a ngai

Damdawi lam kaihhnawih hrang hrang zir tur thlanna NEET (UG) 2026 result chu July 16, 2026 khan National Testing Agency-in a tichhuak a; Mizoram aṭanga exam mi 2,166 zingah mark hmuh ngai zat (cutoff mark) an hmu pha mi 1,353 an awm.

NEET(UG) 2026-ah hian Mizoram aṭanga pakhatna chu India ram pumah 11,875-na a ni a, tribal bik zingah 83-na a ni. Hmarchhak state tina pakhatna ṭheuh zingah Mizorama pakhatna aia ti ṭha state pali an awm a, ti ṭha lo zawk state pathum an awm thung.

Mizorama pakhatna hi ram pumah 11,875-na ni pha chauh mah se, kum hmasaa mite aiin a ti ṭha zawk daih a, a rank pawh kum hmasaa mite aiin a sang zawk hlea sawi a ni. Hmarchhak state zingah a hniam ber kan ni fo a, kuminah chuan a laihâwl kan ni ta. Kuminah chuan nasa takin hmasawnna a awm tih a hriat a, duhthusam ni lo mah se, a lawmawm.

Mizote hi zirnaah sang ve tawhin, thiam ve viau tawh mah ila, India ram pum huapah erawh chuan kan la sang lo viau. Chu chu India ram pum huapa inelna - NEET bakah, UPSC leh SSC buatsaih exam-te leh thil dang dang result aṭangin a chiang.

Mizoram chhung bika thiam ber nih te, ti ṭha ber pawl nih te hi a ṭha em em a, mahse, India ram pum huapah chuan a ṭha tâwk lo hle tih kan hre tlang. Chuvangin, kan ṭhalaite, kan zirlaite nasa lehzuala an ṭan a ngai a ni.

Zirna leh hna zawnnaah inelna a sàn tawh em avangin Mizote nasa taka an ṭan lehzual a ngai. Mizo zirlai leh ṭhalai zinga thiam bik leh ṭha bikte hi chuan Mizoram duhtâwk mai loin, India ram pum thlir se, tun aia India ram pum huapa nihna (rank) sang zawk nei turin ṭan la sauh sauh teh se.

India ram pum anga sang zawka zirlaite leh ṭhalaite an invawrh kàn theihna tur chuan nu leh pa leh chhungkua ten hmathlir thui tak an neihpui a ṭul a, ṭhahnemngai an ngaihpui a ngai. Fuih phûr te, a ṭul apianga ṭanpui a, sum leh paiah pawh mahni phâk tâwkah inhuam thui a ngai a ni.