Police tharte'n rinawm takin thawk se

Nikuma sorkarin police constable tura a lakte chu Police Training School-ah chawlhkar 45 chhung thil chi hrang hrang zirtir an nih hnuah police hna tak tak thawk turin July 18, 2026 khan thlah an ni.

August 26, 2025 khan police constable atan mi 277 lak an ni a, hna dang hmuh vanga training zo ta lo mi pahnih tih loh mi 275, mipa 249 leh hmeichhia 26 te chuan ṭha takin training an zo a ni. Police hna leh dan chi hrang hrang an zir a; computer, hnam zia leh nunphung, vantlang zinga chêt dan phung thlengin zirtir an ni.

Tun hmain police lakah tute emaw duhsak bik a, tling tâwk lo chunga lak te, ruihhloa fihlim lo lakte a awm thu sawi a ni ṭhin a; chu chìn dan ṭha lo chuan Police-ah nghawng ṭha lo a nei zui nia sawi a ni bawk.

Tunah erawh chuan police laka 'fair ber' tih ngam khawpa police lakna kalpui a ni ta hi a lawmawm. Police lak dan dik hian ṭhalai, hna zawng mekte tan pawh beiseina thar siamin, a tihphûr ngei a rinawm a; kalphung dik hmanga police atana lâkte pawhin ram leh mipui tan thlamuanna an thlen a rinawm.

Mi duhsak bik an awm avang leh, thiamna leh theihnaa tling lo chunga sorkar hna thawk tura lak an awm hian, lak ve lohte rilru a na ṭhin a; dik taka hna laknaa tling lo nih erawh pawm a nuam ṭhin. Hun kal zel turah pawh hna thawk tur lakna rêng rêngah induhsak bikna awm loin, a tling leh ṭha apiang lak an nih zel theih nan sorkar hian hma la zel rawh se.

Police training zo tharte hi an thiamna leh theihna hmanga dik tak lak an nih angin, police hna an thawh zuinaah dik tak leh taima taka an thawh zui hi sorkar leh mipuiin an beisei dan a ni a; chu chu an hriat reng a ngai.

Police tharte hian ram, khawtlang leh mipui veng himtu tur leh thlamuantu tur an ni tih inhre reng se; mi dangte rîkrâp zawnga che lo turin an invengin an inthunun ṭha tur a ni. Ram tan, sorkar tan rinawm leh taima tak, ṭhahnemngai leh huaisen takin police hna han thawk teh se.