CD ratio chhe lutuk bank-te hi

July 1, 2026 khan Aizawl District Consultative Committee/District Level Review Committee/ District Level Security Committee an ṭhut a; January - March 2026 chhunga Aizawl district-a bank-te credit deposit (CD) ratio chawhrual 43.50% a ni.

Tarlan danin, kumin January-March chhunga Aizawl district-a bank CD ratio sang ber Indian Bank-in 464.97% a neih laiin, a hniam ber YES Bank-in 5.27% chiah a nei. Aizawl district-ah bank 24 awm zinga pali chu CD ratio 20% aia hniam a ni a, 40% aia sang nei bank 18 an awm.

YES Bank CD ratio hi a hniam hle reng tih record aṭangin a lang; July-September 2025 chhunga an CD ratio pawh 5.30% chauh a lo ni tawh a, Chief Minister-in insawifiah turin a hriattir hial.

Bank-te hian sum an dawn (deposit) rualin, advances (loan) an pe chhuak tur a ni a; India ramah chuan bank-te'n loan an pek tura beisei chu deposit an hmuh aṭangin 60% aia tlem lo a nia sawi a ni. Mizorama regional bank-te leh nationalised bank ṭhenkhatte CD ratio a ṭha tlangpui a, commercial bank-te CD ratio a chhe tlangpui tih record aṭangin a lang.

Bank ṭhenkhatte Mizoram mipui, pawl leh kohhran te tan an chêt nasat em em laiin, tun thlenga che ṭha duh miah lo an awm hi a zialo hle; bank ṭhenkhat chuan an tum lo hrim hrim niin a lang.

Sorkara thuneitute'n na taka an nawra an vau hial chung pawha bank ṭhenkhatin CD ratio tihsan an tum miah lo nia lang hi a veiawm tak zet. Bank ṭhenkhat chuan kut hnathawktute leh kutkawih eizawnna lam khawihtute tan loan pek chhuah an tum lo hrim hrim niin a lang. Mizoram leh mipui hi sum hmuhna atan leh an hlâwkna atan chauh an duh a, mipui tan pek lêt ve an tum miah lo niin a lang thei bawk.

An hlâwkna atan chauh Mizoram mipui hman tum a, mipui tana pek lêt ve tum si lo bank-te hi sorkar hian dîm lo se la. Ṭawngkaa vau ringawtin awmzia a nei thui lo tih a chiang tawh, a taka chêt a ngai ta niin a lang; sorkar hi a ṭul angin khawng takin che tawh rawh se; thuneitute na zawka an chêt a ngai ta.